काठमाडौं– भोटेकोशी बाढी तथा पहिरोबाट प्रभावित क्षेत्रमा नेपाली सेनासहितका सुरक्षा निकायले शुक्रबार दिनभर खोज तथा उद्धार अभियानलाई तीव्रता दिएका छन्। नेपाली सेनाका ७ र गैरसैनिक ६ वटा हवाई साधन परिचालन गरी ५८ जनाको उद्धार गरिएको छ भने विभिन्न जलविद्युत् आयोजनाका सुरुङमा फसेकाको खोजी पनि जारी राखिएको छ।
साँझ ७ बजेसम्मको अद्यावधिक विवरणअनुसार त्रिशूली–३ ‘ए’को सुरुङबाट दुई जनालाई जीवितै उद्धार गरिएको छ भने एक शवसमेत निकालिएको छ। अन्य प्रभावित क्षेत्रमा पनि स्थल तथा हवाई माध्यमबाट खोजी, उद्धार र राहत कार्य जारी छ।
त्रिशूली–३ ‘ए’बाट दुई जनाको जीवित उद्धार
त्रिशूली–३ ‘ए’ जलविद्युत् आयोजनाको सुरुङभित्र फसेका दुई जनालाई नेपाली सेनाको नेतृत्वमा सशस्त्र प्रहरी, नेपाल प्रहरी तथा विज्ञ सम्मिलित संयुक्त टोलीले जीवितै उद्धार गरेको छ।
नेपाली सेनाका ७५, सशस्त्र प्रहरीका १८ तथा नेपाल प्रहरी र विज्ञसहितको टोली उद्धारमा खटिएको थियो। उद्धार गरिएका दुवै जनालाई हेलिकप्टरमार्फत छाउनीस्थित वीरेन्द्र सैनिक अस्पताल ल्याई उपचार भइरहेको छ।
उद्धारकै क्रममा सोही स्थानबाट एक शवसमेत निकालिएको छ। सुरुङभित्र थप व्यक्ति फसेको आशंकामा खोजी कार्य भने जारी छ।
त्रिशूली–३ ‘बी’मा १५ फिट गहिरो खाडल
त्रिशूली–३ ‘बी’ आयोजनामा नेपाली सेना, गैरसैनिक टोली तथा आयोजनाका प्रबन्ध निर्देशकसहितको संयुक्त टोलीले कार्यालय र आवास रहेको क्षेत्रमा करिब १५ फिट गहिरो खाडल खनेर खोजी गरेको छ। हालसम्म त्यहाँबाट कुनै व्यक्ति फेला परेका छैनन्।
त्रिशूली–३ ‘ए’सँग ‘लिङ्कअप’ गराउने उद्देश्यले एक्स्काभेटर प्रयोग गरी करिब ७०० मिटर बाटोसमेत सफा गरिएको छ।
लाङटाङ हाइड्रोमा दुई शव फेला
लाङटाङ हाइड्रोको सुरुङभित्र प्रवेश गरेको नेपाली सेना र गैरसैनिकसहितको संयुक्त टोलीले दुई शव फेला पारेको छ।
नेपाली सेनाका २५ जना तथा दुई गैरसैनिकसहितको टोलीले सुरुङभित्र खोजी गरिरहेको छ। थप व्यक्ति फसेको हुनसक्ने आशंकामा खोजी तथा उद्धार कार्यलाई निरन्तरता दिइएको छ।
चिलिमेमा लेदो हटाउँदै सुरुङभित्र प्रवेश
चिलिमे जलविद्युत् आयोजनाको सुरुङमा विदेशी प्राविधिकसहितको संयुक्त टोलीले जेनेरेटर र ‘मड पम्प’ प्रयोग गरी सुरुङभित्र जमेको लेदो हटाएको छ।
लेदो हटाउँदै टोली पुनः सुरुङको करिब १०० मिटर भित्री भागसम्म पुगेको छ। त्यहाँ पनि खोजी कार्य जारी छ।
माथिल्लो त्रिशूली–१ मा र्याफ्ट र डुंगाबाट खोजी
हाकुस्थित माथिल्लो त्रिशूली–१ आयोजनाको सुरुङमा नेपाली सेनाका १७ जना तथा आयोजनाका प्रतिनिधि सम्मिलित टोलीले खोजी गरिरहेको छ।
टोलीले सुरुङभित्र जमेको पानी निकाल्नुका साथै र्याफ्ट र डुंगासमेत प्रयोग गरेर सम्भावित जोखिम क्षेत्रमा खोजी अघि बढाएको छ।
५८ जनाको हवाई उद्धार
शुक्रबार साँझ ७ बजेसम्म नेपाली सेनाका सात तथा गैरसैनिकतर्फका ६ वटा हवाई साधन परिचालन गरी विभिन्न प्रभावित क्षेत्रबाट ५८ जनाको उद्धार गरिएको छ।
बाढी तथा पहिरोबाट सडक सम्पर्क विच्छेद भएका र तत्काल उद्धार आवश्यक परेका नागरिकलाई प्राथमिकताका आधारमा हवाई माध्यमबाट सुरक्षित स्थानमा ल्याइएको हो।
तादी नदीमा पुल जडानको तयारी
देवीघाटस्थित तादी नदीमा पुल जडानका लागि नेपाली सेनाको इन्जिनियरिङ फौजबाट ५५ जनाको टोली खटिएको छ। टोलीले पुल जडानका लागि आवश्यक बेस निर्माणको काम गरिरहेको छ।
गजुरीमा रहेको एक्रो ब्रिजका केही सामग्री त्रिशूली पुर्याइसकिएको छ भने बाँकी सामग्रीसमेत ढुवानी भइरहेको छ।
९ हजार ३ सयभन्दा बढी सैनिक प्रभावित क्षेत्रमा
जमिनी खोज तथा उद्धार, स्वास्थ्य सेवा, सडक खुलाउने तथा शव व्यवस्थापनमा समेत नेपाली सेनाले अभियान जारी राखेको छ।
रसुवाको टिमुरेदेखि नुवाकोट, धादिङ, चितवन र नवलपरासी पूर्वसम्मका प्रभावित क्षेत्रमा नेपाली सेनाका ९ हजार ३ सयभन्दा बढी सैनिक प्रत्यक्ष रूपमा परिचालित छन्।
टोलीहरूले जंगल, डाँडा, खोला तथा बस्ती क्षेत्रमा पैदल गस्ती गर्नुका साथै चिकित्सकसहितको स्वास्थ्य टोलीमार्फत स्थानीयलाई आवश्यक स्वास्थ्य सेवा प्रदान गरिरहेका छन्। साथै घाइतेको खोज तथा उद्धार, शव व्यवस्थापनमा सहयोग, अवरुद्ध सडक खुलाउने र आपत्कालीन उपचारका कामसमेत एकसाथ अघि बढाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
