फाइल तस्बिर
काठमाडौं– अविरल वर्षा, बाढी र पहिरोका कारण देशका विभिन्न जिल्लाका राजमार्ग तथा सडकखण्ड प्रभावित भएका छन्। केही सडक पूर्ण रूपमा अवरुद्ध छन् भने केहीमा वैकल्पिक मार्ग तथा निश्चित समयअनुसार सवारी सञ्चालनको व्यवस्था गरिएको नेपाल प्रहरीले जनाएको छ।
काभ्रेपलाञ्चोकको नेपालथोक–कटुन्जेबेँसी हुँदै सिन्धुलीको खुर्कोटसम्मको बीपी राजमार्गमा भदौ १६ गतेदेखि बेलुका ७ बजेदेखि बिहान ५ बजेसम्म १० टनसम्म तौल भएका मालवाहक तथा ढुवानीका साधन सञ्चालन हुनेछन्।
त्यसैगरी बिहान ४ बजेदेखि बेलुका ६ बजेसम्म निजी तथा सार्वजनिक यात्रुवाहक सवारी साधन सञ्चालन हुने व्यवस्था गरिएको छ। मकवानपुरका विभिन्न राजमार्गमा १० चक्कासम्मका मालवाहक तथा ठूला यात्रुवाहक सवारी साधन त्रिभुवन राजपथ हुँदै काठमाडौं जाने र फर्किँदा कान्ति राजमार्ग प्रयोग गर्ने व्यवस्था गरिएको छ।
कान्ति राजमार्ग हुँदै हेटौँडातर्फ आउने यात्रुवाहक सवारी साधनले साँझ ६ बजेसम्म मकवानपुरको इलाका प्रहरी कार्यालय ठिङ्गन चेकपोस्ट पार गरिसक्नुपर्नेछ।
१४ सिटभन्दा कम क्षमताका साना यात्रुवाहक सवारी साधन हेटौँडातर्फ आउँदा फर्पिङ–फाखेल–कुलेखानी हुँदै भीमफेदीतर्फ आउन सक्नेछन्। काठमाडौं जाँदा भीमफेदी–कुलेखानी–सिस्नेरी–दक्षिणकाली मार्ग प्रयोग गर्न सकिने प्रहरीले जनाएको छ।
मकवानपुरको त्रिखण्डी नजिकै रहेको बेलीब्रिजको भारवहन क्षमता कमजोर रहेकाले इन्धन तथा भारी मालवाहक सवारी साधनले उक्त पुल प्रयोग नगरी छेउको डाइभर्सन प्रयोग गर्नुपर्नेछ।
विपद्को अवस्था रहेकाले अत्यावश्यक अवस्थामा मात्र यात्रा गर्न, आफ्नो पालोमा अनुशासित रूपमा सवारी सञ्चालन गर्न, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मी र ट्राफिक प्रहरीको निर्देशन पूर्ण रूपमा पालना गर्न प्रहरीले आग्रह गरेको छ।
नुवाकोटको टोखा–छहरे सडकखण्डमा वर्षाका कारण अत्यावश्यक सेवाबाहेक अन्य सवारी साधनको रातिको आवागमनमा रोक लगाइएको छ। भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म उक्त सडकखण्डमा अत्यावश्यक सेवाबाहेक सबै सार्वजनिक तथा निजी सवारी साधनको आवागमन बन्द गरिएको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने सडकखण्ड त्रिशूली नदीले सडकमुनिबाट कटान गरेपछि साउन ८ गतेदेखि अवरुद्ध भएको थियो। साउन १० गते आएको बाढीका कारण सडकको अधिकांश भाग नष्ट भएको प्रहरीले जनाएको छ।
बाढीका कारण त्रिशूली बजार, बेत्रावती बजार हुँदै रसुवागढी नाकासम्म जाने मुख्य पासाङल्हामु राजमार्ग पनि पूर्ण रूपमा अवरुद्ध छ। स्याफ्रुबेंसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेंसीसम्मको एक लेनको कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
धादिङको बेनिघाट रोराङ गाउँपालिका–७ कृष्णभीरस्थित पृथ्वी राजमार्गमा त्रिशूली नदीले सडक कटान गर्दा सडक भासिएपछि २०८३ भदौ १४ गते बिहान करिब ८ बजेबाट राजमार्ग पूर्ण रूपमा अवरुद्ध भएको छ।
सोही दिन दिउँसो करिब १२ बजे गजुरी गाउँपालिका–२ परेवा भीरस्थित पृथ्वी राजमार्गको सडकखण्डमा बाढीका कारण सडकको तल्लो भाग भासिएको थियो। उक्त स्थानमा साना सवारी साधनका लागि एक लेनको बाटो सञ्चालनमा आएको प्रहरीले जनाएको छ।
मुगुको छायानाथ रारा नगरपालिका–४ ताल्चास्थित नाग्मदेखि मुगु गमगढी आउने सडकखण्ड अवरुद्ध भएको छ। १६ गते साँझ करिब ६:१५ बजे अविरल वर्षाका कारण माथिबाट ढुङ्गा, माटो र लेदोसहितको पहिरो आएपछि सडक पूर्ण रूपमा अवरुद्ध भएको हो।
रोल्पाको परिवर्तन गाउँपालिका–३ भालखोरस्थित सहिद राजमार्ग सडकखण्डमा २०८३ भदौ १७ गते रातिदेखि परेको अविरल वर्षाका कारण पहिरो खसेपछि सडक पूर्ण रूपमा अवरुद्ध भएको छ।
यस्तै, भदौ १८ गते दिउँसो करिब ३:४० बजे परिवर्तन गाउँपालिका–६ दुईखोली बजारस्थित घोराही–थवाङ सहिद मार्गमा सडकको तल्लो भागमा पहिरो गएपछि सडक पूर्ण रूपमा अवरुद्ध भएको प्रहरीले जनाएको छ।
अर्घाखाँचीको पाणिनी गाउँपालिका–२ बालसिद्ध मन्दिर नजिक सालझण्डी–ढोरपाटन सडकखण्ड पनि अवरुद्ध भएको छ। भदौ १८ गते दिउँसो २:४० बजे सडक माथिबाट ढुङ्गासहितको सुख्खा पहिरो खसेपछि सडक पूर्ण रूपमा अवरुद्ध भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798469.jpg)
-1786602170.png)
-1786513116.png)
-1788425345.png)
