काठमाडौं– नेपाली सेनाले बाढी तथा पहिरो प्रभावित विभिन्न क्षेत्रबाट हालसम्म २७३ विदेशी नागरिकसहित ३ हजार ९३५ जनाको हवाई उद्धार गरेको छ ।
सेनाका अनुसार २०८३ भदौ १८ गते साँझ ७ बजेसम्म थप १३ जनाको हवाई उद्धार गरिएको हो ।
टनेलमा फसेका व्यक्तिको खोजी तथा उद्धार कार्य पनि जारी छ । लाङटाङ हाइड्रोको टनेलमा विदेशीसमेत २५ जनाको संयुक्त टोलीले करिब २०० मिटरभित्र प्रवेश गरी दुई स्थानमा होल बनाएर खोजी गरिरहेको छ । उक्त टनेलबाट दुई शव फेला परिसकेका छन् ।
त्रिशूली–३ ए आयोजनाको टनेलमा ९३ जनाको टोलीले लेदो, ढुङ्गा र बालुवा हटाउँदै करिब ३० मिटरभित्र पुगेको छ । टनेलभित्र भेटिएको ठूलो ढुङ्गा ब्लास्टिङ गरी सफा गर्ने काम भइरहेको सेनाले जनाएको छ । त्रिशूली–३ बीमा पनि कार्यालय तथा आवास क्षेत्रमा पुग्न बाटो खुलाउने र टनेलभित्र खोजी गर्ने काम भइरहेको छ ।
माथिल्लो त्रिशूली–१ को टनेलबाट एक शव फेला परेको छ भने अन्य भागमा समेत खोजी जारी छ । चिलिमे हाइड्रोमा पनि संयुक्त टोलीले खोज तथा उद्धार गरिरहेको छ ।
यसैबीच, देवीघाटस्थित तादी नदीमा पुल जडानका लागि सेनाको ५५ सदस्यीय इन्जिनियरिङ टोली खटिएको छ । गजुरीमा रहेको एक्रो ब्रिज त्रिशूलीतर्फ लैजाने तयारी भइरहेको छ ।
सेनाले त्रिशूली र धुन्चेमा सञ्चालन गरेको आपत्कालीन उपचार केन्द्र तथा मेडिकल पेट्रोलबाट बिहीबार ७३ जनालाई स्वास्थ्य सेवा दिएको छ । हालसम्म ३ हजार २१५ जनाले स्वास्थ्य सेवा प्राप्त गरेका छन् ।
मित्रराष्ट्रबाट प्राप्त करिब १ हजार ९०० किलो राहत तथा उद्धार सामग्री सेनाले हवाई साधनमार्फत धुन्चे र त्रिशूली पुर्याएको छ । टिमुरेदेखि नुवाकोट, धादिङ, चितवन र नवलपरासी पूर्वसम्म ९ हजार ३ सयभन्दा बढी सैनिक प्रत्यक्ष रूपमा उद्धार, शव व्यवस्थापन, सडक सञ्चालन र आपत्कालीन उपचारमा खटिएका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788441385.jpg)
-1786602170.png)
-1786513116.png)
-1788425345.png)
