काठमाडौँ — २४ भदौमा जेन–जी आन्दोलनको आडमा सर्वोच्च अदालतमा भीषण आगलागी भयो, जसले गर्दा सर्वोच्च अदालत पूर्ण रूपमा नष्ट भयो। भवन मात्र नष्ट भएन, २००७ सालदेखिका मिसिलसमेत नष्ट भए।
यसरी न्यायिक इतिहास एकैपटक खरानी भएपछि सर्वोच्च अदालत निर्माणाधीन भवनमा सर्यो। भवन पूर्ण रूपमा तयार नभए पनि कामचलाउ इजलासहरू बनाएर न्यायसम्पादनको काम थालियो । सर्वोच्चले फाइल प्राप्त गरेर न्यायसेवा सुरु गरेको ठीक एक वर्षपछि, सोही दिनको घटनाको झल्को दिने गरी बुधबार मध्यरातमा आगलागी भएको छ।
बुधबार दिनभरी न्यायाधीशहरुले न्यायसम्पादन गरेको सर्वोच्च अदालतको नयाँ भवनमा मध्यराति साढे १२ बजे आगलागी भएको हो। नयाँ अभिलेखको भवमा आगलागीको कारण विद्युत्को तार सर्ट हुनसक्ने अनुमान सर्वोच्च प्रशासनले गरेको छ। मध्यरातमा जब सर्वोच्च अदालतको भवन धुवाँको मुस्लोले भरियो, तब मुख्य रजिस्ट्रार विमल पौडेलसहितले प्रधानन्यायाधीश मनोजकुमार शर्मालाई फोन गरेर खबर गरेका थिए।
मध्यरातमा नयाँ भवन धुवाँको मुस्लोले भरिएको खबर पाएपछि राति १ बजे नै मुख्य रजिस्ट्रार सर्वोच्च पुगेका थिए। राति नै काठमाडौं महानगरपालिकाको दमकल बोलाइयो। उक्त दमकलले करिब आधा घण्टापछि आगो नियन्त्रणमा लिएको प्रशासनमा कार्यरत एक कर्मचारीले बताए।
आगो नियन्त्रणमा आएर हेर्दा भुइँतलामा रहेको अभिलेख शाखामा आगलागी भएको र केही मिसिल तथा पुराना फाइल जलेको पाइएको छ। विद्युत्को तार सर्ट भएर आगो लागेको प्रारम्भिक अनुसन्धानबाट देखिएको छ।
तत्कालै काठमाडौं महानगरपालिकाबाट दमकल बोलाएर आगो नियन्त्रणमा लिइयो। सर्वोच्च अदालतका प्रवक्ता अर्जुन कोइरालाले सामान्य आगलागी भएको र पछि नियन्त्रणमा आएको बताए। सर्वोच्चका एक कर्मचारीका अनुसार तीनवटा स्टिलको दराजमा रहेका प्रमाण मिसिल जलेका थिए।
गत भदौ २४ गतेको जेन–जी आन्दोलनका क्रममा न्याय निरूपणको सर्वोच्च निकाय सर्वोच्च अदालतसमेत खण्डहर बनेर भर्खर तङ्ग्रिँदै गरेको बेला पुनः आगलागी भएको घटना सुनेपछि सर्वोच्चका न्यायाधीश र कर्मचारी आत्तिएका थिए।
सो क्रममा सर्वोच्च अदालतमा मात्रै १ अर्ब २१ करोड रुपैयाँ बराबरको क्षति भएको थियो। रामशाहपथमा रहेको सर्वोच्च अदालतको मूल भवनमा आगजनी र तोडफोड हुँदा ५० करोड बराबरको क्षति भएको थियो। त्यस्तै, सवारी साधनमा ४० करोड क्षति भएको थियो। ४० करोड १९ लाख ५ हजार ७ सय ८ रुपैयाँ मूल्यका सवारीसाधन पूर्ण रूपमा क्षति भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1709961276.jpg)
-1786602170.png)
