काठमाडौं– रसुवाको भोटेकोशीमा आएको बाढीपछि फेला परेका शव पहिचान गर्न समस्या भएपछि सरकारले डीएनए परीक्षणमार्फत पहिचान गर्ने प्रक्रिया अघि बढाएको छ।
बाढीमा फेला परेका कतिपय शव गलेको, अनुहार चिन्न नसकिने तथा केहीको शरीरका अङ्ग मात्रै फेला परेकाले पहिचानमा कठिनाइ भएको हो। यस्तो अवस्थामा राष्ट्रिय विधि विज्ञान प्रयोगशाला, खुमलटारले मृतक तथा बेपत्ता व्यक्तिका नजिकका आफन्तको डीएनए परीक्षण गरी शव पहिचान गर्ने व्यवस्था गरेको छ।
प्रयोगशालाका अनुसार बेपत्ता व्यक्तिका बाबु, आमा, छोरा वा छोरीले डीएनए परीक्षणका लागि रगतको नमुना दिन सक्छन्। आफन्तबाट सङ्कलन गरिएको डीएनए प्रोफाइलसँग फेला परेको शवको डीएनए मिलान गरी पहिचान पुष्टि भएपछि शव सम्बन्धित परिवारलाई हस्तान्तरण गरिनेछ।
डीएनए परीक्षणका लागि नमुना दिनुअघि सम्बन्धित परिवारले नेपाल प्रहरीसँग सम्पर्क गर्नुपर्नेछ। नमुना दिने आफन्तले दुई प्रति पासपोर्ट साइजको फोटोसमेत साथमा लैजानुपर्ने प्रयोगशालाले जनाएको छ।
कहाँ दिने रगतको नमुना ?
काठमाडौं उपत्यकामा सम्बन्धित आफन्तको रगतको नमुना नेपाल प्रहरी अस्पताल, महाराजगन्जको प्याथोलोजी प्रयोगशालामा सङ्कलन गरिनेछ।
उपत्यकाबाहिर रहेका आफन्तले भने आफूलाई पायक पर्ने जिल्ला प्रहरी कार्यालयमा सम्पर्क गर्न सक्नेछन्।
नेपालबाहिर रहेका आफन्तले आफू बसेको देशको आधिकारिक फरेन्सिक प्रयोगशालाबाट डीएनए प्रोफाइल तयार गराउन सक्नेछन्। त्यसरी प्राप्त डीएनए प्रोफाइलको इलेक्ट्रोनिक प्रतिलिपि भने सिधै नेपाल प्रहरीलाई पठाउनुपर्ने राष्ट्रिय विधि विज्ञान प्रयोगशाला खुमलटारले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1709961276.jpg)
-1786602170.png)
