काठमाडौं– चीनले भोटेकोशी बाढीपछि नेपाललाई २० लाख अमेरिकी डलर नगदसहित आपत्कालीन सहयोग उपलब्ध गराएको छ। चिनियाँ रेडक्रस सोसाइटीबाट २ लाख अमेरिकी डलर, ५५.८ टन राहत सामग्री, विपद् प्रभावित क्षेत्रका तस्बिर, स्याटेलाइट तथा जलविज्ञानसम्बन्धी तथ्यांक, चिनियाँ सुरुङ उद्धार विशेषज्ञका दुई टोली र डीएनए पहिचानसम्बन्धी पाँच विशेषज्ञ सहायता गरेको चिनियाँ विदेश मन्त्रालयले जनाएको हो ।
यस्तै अमेरिकाले भोटेकोशी बाढीपछि नेपाललाई थप मानवीय तथा विपद् प्रतिकार्य सामग्री उपलब्ध गराएको जनाएको छ। नेपालस्थित अमेरिकी दूतावासले बुधबार दिएको जानकारीअनुसार दुई अमेरिकी सैन्य कार्गो विमानमार्फत नेपाल नेतृत्वको खोज, उद्धार तथा पुनःस्थापना अभियानलाई सहयोग पुर्याउन विपद् प्रभावितको उद्धार तथा व्यवस्थापनका लागि आवश्यक ५,००० थान विशेष सामग्री, ५०० थान प्राथमिक उपचार किट, स्ट्रेचर र फ्रन्ट–एन्ड लोडर नेपाल ल्याइएको हो । उक्त सामग्रीमा पानी फिल्टर, त्रिपाल, कम्बल, सरसफाइसम्बन्धी किट तथा सौर्य बत्ती रहेका छन्।
भुटानको शाही सरकारले हालै आएको विनाशकारी बाढीपछि राहत तथा पुनःस्थापना प्रयासमा सहयोग पुर्याउन नेपालका प्रधानमन्त्री दैवी प्रकोप उद्धार कोषमा १० करोड भारतीय रुपैयाँ (आईएनआर) सहयोग गरेको छ। सहयोग रकमको चेक बुधबार नयाँदिल्लीस्थित नेपाली राजदूतावासमा भारतका लागि भुटानका राजदूत महामहिम मेजर जनरल भेट्सोप नामग्यालले नेपालका चार्जे द’अफेयर्स सुरेन्द्र थापालाई हस्तान्तरण गरे।
नेपालले भुटान सरकार र त्यहाँका जनताको यस ऐक्यबद्धता तथा सद्भावको भावनाको गहिरो प्रशंसा गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1709961276.jpg)
-1786602170.png)
