काठमाडौं– नेपाली सेनाले भोटेकोशी बाढी प्रभावित विभिन्न क्षेत्रबाट बुधबार साँझसम्म थप ३४ जनाको हवाई उद्धार गरेको छ । सेनाका अनुसार हालसम्म हवाई माध्यमबाट २७३ विदेशी नागरिकसहित ३ हजार ९२५ जनाको उद्धार गरिएको छ ।
रसुवागढी हाइड्रोपावरको टनेलमा नेपाली सेना र आयोजनाका इन्जिनियरसहितको टोली २७५ मिटरसम्म पुगेर खोजी गरिरहेको छ । उद्धारलाई तीव्र बनाउन हेभी मेसिन तथा एक्स्काभेटर टनेलभित्र लैजाने तयारी भइरहेको सेनाले जनाएको छ ।
लाङटाङ हाइड्रोमा विदेशीसमेत २५ जनाको संयुक्त टोलीले टनेलभित्र करिब १५० मिटरसम्म पुगेर खोजी गरिरहेको छ । चिलिमे हाइड्रोमा पनि संयुक्त टोली १५० मिटरसम्म पुग्दा टनेल बन्द अवस्थामा फेला परेको र साउन्ड डिटेक्टरबाट निगरानी भइरहेको छ ।
अपर त्रिशूली–१ को टनेलको मुख ढुंगाले छेकिएको हुँदा भित्र प्रवेशको प्रयास भइरहेको छ । हाकुबेँसीमा विदेशीसमेतको टोली २६० मिटरसम्म पुगेर खोजी गर्दा हालसम्म केही फेला परेको छैन ।
त्रिशूली–३ ‘ए’ मा ९३ जनाको संयुक्त उद्धार टोलीले चारवटा स्काभेटर र एक बबक्याट प्रयोग गरी लेदो तथा माटो हटाइरहेको छ । कम्प्रेसर, ब्रेकर तथा ब्लास्टिङमार्फत टनेलको आउटलेटमा रहेको अवरोध हटाउने काम भइरहेको सेनाले जनाएको छ ।
त्रिशूली–३ ‘बी’ मा ६१ जना नेपाली सेना, तीन गैरसैनिक तथा आयोजनाका प्रबन्ध निर्देशकसहितको टोलीले कार्यालय, आवास र क्याम्प क्षेत्रमा खोजी गरिरहेको छ ।
यसैबीच, प्रभावित क्षेत्रका जंगल, डाँडा, खोला तथा बस्तीमा पैदल गस्ती गर्दै खोज तथा उद्धारसँगै स्वास्थ्य सेवा प्रदान भइरहेको छ । टिमुरे क्षेत्रमा फेला परेका शवलाई त्रिशूलीसम्म ल्याउन स्लिङ लोड अपरेसनसमेत सुरु गरिएको छ ।
सेनाका अनुसार टिमुरेदेखि नुवाकोट, धादिङ, चितवन र नवलपरासी पूर्वसम्म ९ हजार २ सयभन्दा बढी सैनिक प्रत्यक्ष रूपमा परिचालन भएका छन् । उनीहरूले घाइतेको खोज तथा उद्धार, शव व्यवस्थापन, अवरुद्ध सडक खुलाउने, राहत सामग्री ढुवानी तथा आपत्कालीन उपचारमा सहयोग गरिरहेका छन् ।
बाढी प्रभावित क्षेत्रलाई संक्रमणमुक्त बनाउन रसुवा, नुवाकोट, धादिङ, चितवन, कास्की, तनहुँ तथा नवलपरासीका विभिन्न स्थानमा निसंक्रमण (डिसइन्फेक्सन) को काम भइरहेको छ । अन्य प्रभावित क्षेत्रमा पनि स्थानीय तहसँगको समन्वयमा निसंक्रमण गर्ने तयारी भइरहेको सेनाले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790138176.webp)
-1786602170.png)
-1789631269.jpg)
