फाइल तस्बिर
काठमाडौं– बाढी र पहिरोका कारण देशका विभिन्न जिल्लाका मुख्य राजमार्ग तथा सडकखण्ड अवरुद्ध भएका छन्।
नेपाल प्रहरीका अनुसार बागमती, गण्डकी, कर्णाली र सुदूरपश्चिम प्रदेशका विभिन्न स्थानमा सडक पूर्ण रूपमा अवरुद्ध छन् भने केही सडकमा निश्चित समयमा सवारी सञ्चालनमा रोक लगाइएको छ।
बागमती प्रदेशमा काभ्रेको खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमका कारण बीपी राजमार्गमा राति सवारी सञ्चालनमा रोक लगाइएको छ। बुधबार साँझ ६ बजेदेखि बिहान ४ बजेसम्म सवारी सञ्चालनमा रोक रहने र बिहान ४ बजेदेखि साँझ ६ बजेसम्म परिस्थितिको मूल्याङ्कन गरी सवारी सञ्चालन गरिने जनाइएको छ।
रसुवामा उत्तरगया गाउँपालिका–५ खाल्टे क्षेत्रमा बाढीका कारण त्रिशूली–मेलुङ–स्याफ्रुबेँसी सडकखण्ड पूर्ण रूपमा अवरुद्ध भएको छ। त्यस्तै, मुख्य राजमार्गतर्फ पनि बाढीका कारण सडक पूर्ण रूपमा अवरुद्ध रहेको र अर्को सूचना नभएसम्म खुल्ने अवस्था नरहेको जनाइएको छ।
नुवाकोटमा शिवपुरी गाउँपालिका–६ छहरेखोलामा बाढीको सम्भावित जोखिमका कारण टोखा–छहरे सडकखण्डमा रातिको समयमा सवारी सञ्चालनमा रोक लगाइएको छ। वेत्रावती नगरपालिका–१० क्षेत्रमा बाढीका कारण पासाङ ल्हामु सडकखण्ड पनि पूर्ण रूपमा अवरुद्ध छ। सुंगढी गाउँपालिका–१ लाङचाङ डाँडामा पहिरो जाँदा विदुर–लाङचाङ सडकखण्ड, रसुवा जाने मार्ग पूर्ण रूपमा अवरुद्ध भएको छ।
धादिङमा बेनीघाट रोराङ गाउँपालिका–७ कृष्णभीर र गजुरी गाउँपालिका–२ क्षेत्रमा पहिरोका कारण पृथ्वी लोकमार्ग पूर्ण रूपमा अवरुद्ध भएको छ। बेनीघाट रोराङ गाउँपालिका–१० जोगीडाँडा र गजुरी गाउँपालिका–२ कमेरेभीर क्षेत्रमा भने सडक एकतर्फी सञ्चालनमा रहेको विवरणमा उल्लेख छ।
गण्डकी प्रदेशको लमजुङमा बेँसीसहर नगरपालिका–६ खरखरे भीरमा पहिरोका कारण बेँसीसहर–मनाङ सडक पूर्ण रूपमा अवरुद्ध भएको छ। कर्णाली प्रदेशको मुगुमा छायाँनाथ रारा नगरपालिका–४ ताल्चामा पहिरोका कारण मुगु–गमगढी सडक पूर्ण रूपमा अवरुद्ध भएको छ।
त्यसैगरी, सुदूरपश्चिम प्रदेशको बैतडीमा दशरथचन्द नगरपालिका–४ झुलाघाट क्षेत्रमा पहिरोका कारण गोठालापानी–झुलाघाट सडकखण्ड पूर्ण रूपमा अवरुद्ध रहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
