काठमाडौं– नेपालस्थित भारतीय दूतावासले अगस्ट २६ मा आएको बाढीमा परी ज्यान गुमाएका भारतीय नागरिकको शव पहिचानका लागि अपनाउनुपर्ने प्रक्रिया सार्वजनिक गरेको छ।
दूतावासले मृतकका आफन्तलाई तस्बिर वा डीएनए प्रोफाइल उपलब्ध गराएर शव पहिचान प्रक्रियामा सहजीकरण गर्न आग्रह गरेको छ।
भारतीय दूतावासका अनुसार मृतकका आफन्तले नेपाल प्रहरीको वेबसाइटमा राखिएका शवका तस्बिर तथा विवरणका आधारमा शव पहिचान गर्न सक्नेछन्।
शव पहिचान भएपछि दूतावासले स्थानीय अधिकारीसँग समन्वय गरी शव भारत लैजाने प्रक्रियामा सहजीकरण गर्नेछ।
दूतावासले जारी गरेको प्रेस विज्ञप्तिमा भनिएको छ, ‘नेपाल सरकारका अनुसार विदेशी नागरिकको शव हस्तान्तरणका लागि निम्न प्रक्रिया पूरा गर्नुपर्नेछ—शवसम्बन्धी कागजात तयार गर्ने, शवको तस्बिर तथा विवरण अभिलेख गर्ने, पोस्टमार्टम परीक्षण गर्ने, मृत्युको कारण प्रमाणित गर्ने, औपचारिक रूपमा पहिचान स्थापित गर्ने, औँठाछाप, डीएनए, फरेन्सिक नमुना संकलन गर्ने, मृतकको राहदानी वा परिचयपत्र प्रमाणीकरण गर्ने, दूतावास÷कन्सुलर समन्वय पूरा गर्ने तथा शव हस्तान्तरणः रिलिज मेमो र रसिद तयार गर्नुपर्छ ।’
यदि आफन्त तथा परिवारका सदस्यले नेपाल प्रहरीको वेबसाइटमा राखिएका मृतकका तस्बिर र विवरणका आधारमा शव पहिचान गर्न सकेमा, काठमाडौंस्थित भारतीय दूतावासले स्थानीय अधिकारीसँग समन्वय गरी शव हस्तान्तरण तथा भारत पठाउने प्रक्रियामा सहयोग गर्ने जनाएको छ।
नेपाल सरकारले स्वास्थ्य जोखिम रोक्न ठूलो संख्यामा शवलाई अस्थायी रूपमा गाडेको दूतावासले जनाएको छ। यस्ता शवको पहिचानका लागि मृतकका प्रथम तहका आफन्तसँग डीएनए मिलान गर्नुपर्ने हुन्छ।
शव अस्थायी रूपमा गाडिएको अवस्थामा आफन्तले डीएनए प्रोफाइल वा रगतको नमुना पठाएर डीएनए मिलान गराउन सक्नेछन्।
दूतावासका अनुसार शवको पहिचान हुन नसकेको वा शव अस्थायी रूपमा गाडिएको अवस्थामा नेपाल सरकारले डीएनए मिलानको व्यवस्था गर्नेछ। नेपालका अधिकारीहरूले शवबाट डीएनए नमुना संकलन गरी उनीहरूको डीएनए प्रोफाइल तयार गरिरहेका छन्।
डीएनए मिलानका लागि मृतकका प्रथम तहका आफन्तले आफ्नो डीएनए प्रोफाइल इमेलमार्फत पठाउन वा नेपाली अधिकारीहरूले माग गरेका प्रारम्भिक विवरणसहित रगतको नमुना उपलब्ध गराउन सक्नेछन्।
भारतीय दूतावासमार्फत सहजीकरण आवश्यक भएमा प्रथम तहका आफन्तको डीएनए प्रोफाइलको प्रतिलिपि पनि पठाउन सकिने दूतावासले जनाएको छ।
डीएनए प्रोफाइलिङसम्बन्धी थप विवरण नेपाल प्रहरीको वेबसाइटमा उपलब्ध रहेको छ। साथै, यससम्बन्धी जानकारीका लागि नेपाल प्रहरीको हेल्पलाइन नम्बर ं९७७ ९८४१ ६१६० ९५ मा सम्पर्क गर्न सकिनेछ।
अगस्ट २६ मा रसुवामा आएको विनाशकारी बाढीबाट हालसम्म ९३९ जनाको मृत्यु भएको छ। हालसम्म चितवनबाट २७९, नवलपरासी पूर्वबाट २१६, नवलपरासी पश्चिमबाट १६८, गोरखाबाट ६५, धादिङबाट ५५, तनहुँबाट ३८ र रसुवाबाट २३ वटा शव फेला परेका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) का अनुसार हालसम्म ३ हजार ९२५ जना बेपत्ता छन्। बेपत्तामध्ये ५९२ जना विदेशी नागरिक रहेका छन्।
हालसम्म ११ हजार ३७९ जनाको उद्धार गरिएको छ। भारतीय विदेश मन्त्रालय (एमईए) ले सोमबार दिएको जानकारीअनुसार नेपालबाट हालसम्म १५८ जना भारतीय नागरिकको सुरक्षित उद्धार गरिएको छ। एएनआई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
