चितवन– भोटेकोशीमा आएको भीषण बाढीपछि त्रिशूली र नारायणी नदी किनारमा भेटिएका शवमध्ये २८० शवको फरेन्सिक परीक्षण तथा डिएनए नमूना संकलन गरिएको छ।
पहिचानका लागि आवश्यक प्रक्रिया पूरा गरेपछि ती शव चितवनको देवघाटमा व्यवस्थापन गरिएको छ। नदीबाट फेला पर्ने शवको पहिचान गर्न भरतपुर अस्पतालमा फरेन्सिक परीक्षण, जैविक नमूना संकलन र अभिलेखीकरणको काम भइरहेको भरतपुर अस्पतालका प्रवक्ता डा रामप्रसाद सापकोटाले जानकारी दिए।
‘भदौ १० गते रातिदेखि सुरक्षाकर्मीले त्रिशूली नदीबाट संकलन गरेका शव अस्पतालमा ल्याउन थालेका थिए। भदौ ११ गते बिहानदेखि फरेन्सिक विज्ञको नेतृत्वमा चिकित्सक टोली परिचालन गरी शव परीक्षण र डिएनए नमूना संकलन सुरु गरिएको हो,’ उनले भने।
त्रिशूली र नारायणी नदीबाट हालसम्म ३२१ शव संकलन भएका छन्। तीमध्ये १२ शवको सनाखत भइसकेको छ भने आफन्तले बुझिसकेका छन्। संकलित शवमा ६६ महिला, ११६ पुरुष, सात बालक र छ बालिका छन्। यस्तै, १२६ शवको पहिचान खुल्न सकेको छैन वा अवस्था स्पष्ट हुन बाँकी छ।
प्रहरीका अनुसार भविष्यमा पहिचान गर्न सकिने गरी अन्तर्राष्ट्रिय मान्यताअनुसार शवलाई देवघाटस्थित व्यवस्थापनस्थलमा सुरक्षित रूपमा राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
