चितवन– पृथ्वी राजमार्गअन्तर्गत कृष्णभीरमा सडक भासिएपछि काठमाडौं उपत्यकामा ग्यास आपूर्ति सहज बनाउन राजधानी बाहिरै ग्यास भरेर ल्याउने व्यवस्था सुरु गरिएको छ।
ग्यास बोकेका बुलेट कृष्णभीर हुँदै जान नसक्ने भएपछि उपत्यका र आसपासका उद्योगले बारा, पर्सा, चितवन, मकवानपुर र नवलपरासी (बर्दघाट–सुस्तापूर्व) का उद्योगसँग समन्वय गरी ग्यास भर्न थालेका हुन्।
नेपाल आयल निगमले ग्यास उद्योगीलाई राजधानी बाहिर ग्यास भर्ने अनुमति दिएपछि यस्तो वैकल्पिक व्यवस्था गरिएको नेपाल एलपी ग्यास उद्योग संघका अध्यक्ष देवान चन्दले जानकारी दिए। ‘उपत्यका र छिमेकी जिल्लामा रहेका १६ उद्योगले बाहिरी जिल्लाका उद्योगको सहयोगमा ग्यास भरेर आपूर्ति गरिने व्यवस्था मिलाएका छौं,’ उनले भने।
उपत्यका र आसपासका क्षेत्रमा मात्रै मुलुकको कुल ग्यास खपतको ४० प्रतिशतभन्दा बढी माग हुने भएकाले सडक अवरुद्ध हुँदा आपूर्तिमा असर पर्न सक्ने अवस्था छ। त्यसलाई ध्यानमा राखेर उद्योगहरूले वैकल्पिक मार्गबाट ग्यास राजधानी भित्र्याउने तयारी गरिएको उनले जानकारी दिए।
उनका अनुसार त्रिभुवन राजपथलगायतका मार्ग प्रयोग गरेर बाहिरी जिल्लामा भरिएको ग्यास उपत्यकासम्म पुर्याइनेछ। श्री ग्यासले बाबा, श्रीकृष्णले साइबाबा, श्रीरामले जानकी तथा नेपाल ग्यासले नेपाल गण्डकी उद्योगमा ग्यास भर्न थालेका छन्। त्यस्तै एभरेष्ट र सुगमले साहारा उद्योगमा ग्यास भर्न सुरु गरेका छन्। बाँकी उद्योगले पनि राजधानी बाहिरका उद्योग वा अन्य उद्योगसँग समन्वय गरी ग्यास भर्ने प्रक्रिया अघि बढाइएको उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875775.jpg)
-1786602170.png)
-1786513116.png)
