काठमाडौं– नेपाली कांग्रेसले भोटेकोशी विपद्पछि भइरहेको उद्धार, राहत तथा पुनर्निर्माणको काम प्रभावकारी हुन नसकेको भन्दै सरकारको कार्यशैलीप्रति प्रश्न उठाएको छ।
कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको पूर्वाधार विकास अवधारणा, संवाद र दृष्टि उपसमितिको संयोजनमा ललितपुरस्थित केन्द्रीय कार्यालय बीपी स्मृति भवनमा वरिष्ठ इन्जिनियर, योजनाविद्, प्राज्ञिक तथा प्राविधिक विज्ञसँग भएको छलफलमा सरकारको विपद् व्यवस्थापनबारे समीक्षा गरिएको हो।
छलफलमा कठिन भौगोलिक क्षेत्रमा रहेका जलविद्युत् आयोजनाका सुरुङमा फसेकाहरूको उद्धारमा प्रयास भइरहेको भनिए पनि परिणाम देखिन नसकेको विषय उठाइएको थियो। हराइरहेका तथा सुरुङमा फसेकाहरूको उद्धारमा अन्तर्राष्ट्रिय सहयोग र स्थापित प्राविधिक विज्ञको सहयोग समयमै लिन नसकेको भन्दै सरकारको आलोचना गरिएको छ।
सरकारी तथा सुरक्षा निकाय, जलविद्युत् आयोजना सञ्चालक, स्थानीय तह र प्राविधिक विज्ञबीच पर्याप्त समन्वय हुन नसकेको पनि छलफलमा निष्कर्ष निकालिएको छ। प्रदेश तथा स्थानीय सरकारलाई प्रभावकारी रूपमा परिचालन नगरेको भन्दै कांग्रेसले स्थानीय तहलाई उद्धार तथा राहतमा व्यापक रूपमा सहभागी गराउनुपर्नेमा जोड दिएको छ।
त्यस्तै, प्रभावित नागरिकले पर्याप्त राहत पाउन नसकेको, स्थानीय निकाय तथा सरोकारवालासँग आवश्यक समन्वय र सञ्चार नभएको विषयमा पनि छलफल भएको थियो।
प्राविधिक विज्ञ, आवश्यक उपकरण तथा दक्ष जनशक्तिको उपयुक्त परिचालनमा सरकारले ध्यान दिनुपर्ने सहभागीहरूको सुझाव थियो। राजनीतिक निकटताका आधारमा नभई दक्षता र विज्ञताका आधारमा प्राविधिक जनशक्ति परिचालन गर्नुपर्ने उनीहरूले बताएका छन्।
छलफलले दक्ष जनशक्ति परिचालन गरी उद्धार तीव्र बनाउने, विज्ञहरूलाई भेदभावरहित रूपमा परिचालन गर्ने र स्थानीय सरकारलाई व्यापक रूपमा सहभागी गराउने सुझाव दिएको छ।
कार्यक्रमको समापन गर्दै प्रतिष्ठानका उपप्रमुख विश्वप्रकाश शर्माले विपत्तिको अवस्थामा सरकारले मानवीय ढंगले काम गर्नुपर्ने र विपत्तिलाई राजनीतिक उपयोगको विषय बनाउन नहुने बताए। उद्धार, राहत र पुनःस्थापनाका काम प्रभावकारी रूपमा अघि बढाउन आवश्यक दबाब सिर्जना गरिने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
