काठमाडौं– प्रधानमन्त्री वालेन्द्र शाह बालेनले भोटेकोशी बाढीपछि सरकारले गरेका कामको उपलब्धि देखाउन दैनिक आफ्नो फेसबुक स्टाटसबाट विवरणहरू सार्वजनिक गरिरहेकामा विरोध हुन थालेको छ।
क्यानडाको एक विश्वविद्यालयमा पत्रकारिता प्राध्यापनरत भानुभक्त आचार्यले ‘प्रधानमन्त्री कार्यालयलाई नमागेको सल्लाह’ भन्दै बाढीयता प्रधानमन्त्रीले लेखेका सात वटा स्टाटस फेसबुकमै लेखेर भए पनि प्रधानमन्त्री कार्यालयको काम र सार्वजनिक चासो सम्बोधन गर्ने प्रयास गर्नु मनासिब नै हो भनेका छन्।
‘तर ती सूचनाहरू निजी फेसबुक अकाउन्टबाट आइरहेका छन्। जबकि प्रधानमन्त्री कार्यालयको औपचारिक फेसबुक पेज छँदैछ, जसमा तीन लाख ३२ हजार फलोअर छन्। त्यो पेज पनि सक्रिय छ,’ उनले भनेका छन्– ‘विभिन्न घटनाक्रमको जानकारी दिइरहेको छ। तर, प्रधानमन्त्रीले सार्वजनिक गरेको धारणालाई यो पेजमा राखिएको छैन। प्रधानमन्त्रीले सार्वजनिक गरेका सूचना हरेक देशवासीका लागि महत्वपूर्ण छन्। तिनले ऐतिहासिक महत्व राख्दछन्। पछि बालेन्द्र साह प्रधानमन्त्रीबाट हटेपछि त्यो निजी अकाउन्टका जानकारीहरू सार्वजनिक रेकर्डमा नभेटिन पनि सक्छन्।’
प्रधानमन्त्रीको निजी अकाउन्टबाट प्रधानमन्त्रीको हैसियतले व्यक्त गरेका विचारहरूलाई तत्कालै प्रधानमन्त्री कार्यालयको औपचारिक फेसबुक पेजमा पनि सार्वजनिक गर्न माग गरेका छन्। ‘यस कार्यले प्रधानमन्त्रीका फलोअर घट्न सक्ने वा कन्टेन्ट मोनिटाइजेसनमा सामान्य असर पर्न सक्छ, तर त्यो प्रधानमन्त्रीको सार्वजनिक सञ्चारको दस्तावेजीकरण गर्ने कामभन्दा बढी महत्वको होइन,’ उनले भनेका छन्।
मन्त्री वा सार्वजनिक पदमा बसेका मानिसले पनि सरकारी सूचना सामाजिक सञ्जालका निजी अकाउन्टमा प्रस्तुत गरेर मोनिटाइज गर्ने काम नगर्न उनले सुझाएका छन्।
‘अन्यथा, यस्तो कार्यलाई देशको सूचना निजी अकाउन्टबाट प्रचार गरेर व्यक्तिगत आर्थिक लाभ लिएको अपराध मानी कारबाही गरियोस्,’ उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
