काठमाडौं– दक्षिणपश्चिम चीनको सिजाङ स्वायत्त क्षेत्रमा पहिरोका कारण बनेको जिरोङ (केरुङ) काउन्टीमाथिको कृतिम तालको पानी लगभग सकिएको चीनको जलस्रोत मन्त्रालयले जनाएको छ।
आइतबार बिहान खिचिएका ड्रोन दृश्य, तस्बिर तथा आपत्कालीन उद्धार टोलीबाट प्राप्त विवरणका आधारमा तालको पानी घटेर नदीको बहाव पुनः सामान्य बन्दै गएको मन्त्रालयले जनाएको हो।
चीन–नेपाल सीमास्थित जिरोङ काउन्टी क्षेत्रमा तीव्र गतिमा आएको शृंखलाबद्ध पहिरोका कारण उक्त ताल बनेको थियो। नेपाली भूभागको उच्च हिमाली क्षेत्रमा हिमनदी खसेपछि सुरु भएको पहिरोले ठूलो क्षति पुर्याएको छ। भोटेकोशीमा आएको बाढीले ७७८ जनाको शव फेला परिसकेको छ। अझ हजारौंको संख्यामा बेपत्ता छन्।
चीनको जलस्रोत मन्त्रालयका अनुसार कृतिम तालभन्दा माथिल्लो क्षेत्रमा रहेको एउटा ठूलो पानी जम्ने खाडल भने अझै जोखिमपूर्ण रहेकाले निरन्तर निगरानी आवश्यक छ। उक्त खाडल तालभन्दा करिब ५.६ किलोमिटर माथि र समुद्री सतहबाट करिब ३ हजार ७०० मिटरको उचाइमा रहेको छ। यो स्थान तालभन्दा करिब ८०० मिटर अग्लो क्षेत्रमा रहेको मन्त्रालयले जनाएको छ।
आइतबार बिहान ११:२३ बजेसम्म उक्त खाडलमा पानीको सतह करिब १ लाख ८ हजार वर्गमिटर रहेको थियो। बिहान ७ बजेको तुलनामा पानीको सतह १९ हजार वर्गमिटरले घटेको थियो। खाडलमा करिब १४ लाख घनमिटर पानी सञ्चित रहेको मन्त्रालयले जनाएको छ।
खाडलले बनाएको बाँधभन्दा करिब १८० मिटर तलतर्फ निरन्तर पानी बगिरहेको थियो। त्यस्तै, खाडलबाट २.५ किलोमिटर तल रहेका तीनवटा पानी जम्ने क्षेत्रमा पानीको संयुक्त सतह ७० हजार वर्गमिटरभन्दा कम रहेको जनाइएको छ।
मन्त्रालयका अनुसार उक्त खाडल र त्यसबाट तलतर्फ रहेका तीनवटै जलसञ्चय क्षेत्रले अझै जोखिम निम्त्याउन सक्ने भएकाले निरन्तर अनुगमन आवश्यक छ।
यसैबीच, नेपाली भूभागमा आएको अर्को पहिरोका कारण शनिबार अघिल्लो कृतिम तालभन्दा करिब २.८ किलोमिटर तल नयाँ कृतिम ताल बनेको थियो। ड्रोन दृश्य र तस्बिरका आधारमा माथिबाट आएको पानीको बहावले नयाँ तालको बाँधसमेत भत्काइसकेको र त्यस क्षेत्रमा नदीको पानी पुनः बग्न थालेको चीनको जलस्रोत मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
