काठमाडौं– रसुवाको विनाशकारी बाढीपछि संकलन गरिएका शवको व्यवस्थापनलाई लिएर प्रश्न उठिरहेका बेला सरकारले ठूलो संख्यामा शवलाई चिस्यानमा राखेर सुरक्षित राख्न सम्भव नभएको जनाएको छ।
कानुनमन्त्री सोबिता गौतमले आइतबार विपद्का बेला ठूलो संख्यामा शव एकैपटक प्राप्त हुँदा उपलब्ध चिस्यानयुक्त स्थानले थेग्न नसकेको बताएकी हुन्।
‘अनुहार हेरेर पहिचान गर्न कठिन हुँदै गएको छ, शरीरको तौल र अवस्था परिवर्तन भएका कारण उठाउन, सार्न र सुरक्षित रूपमा राख्नसमेत अत्यन्त कठिन भइरहेको छ। ठूलो संख्याका शवका लागि निजी अस्पताल सम्मका शव राख्ने चिस्यानयुक्त कक्ष एकैपटक उपलब्ध गराउँदा पनी थेग्न नसकिने स्थिती भयो,’ उनले सामाजिक सञ्जालमा लेखेकी छन्।
रसुवामा बाढीपछि ठूलो मानवीय क्षति भएको छ भने अझै धेरै नागरिक बेपत्ता छन्। नेपाल प्रहरीका अनुसार शनिबार अपराह्न ३ बजेसम्म नदी किनारका विभिन्न स्थानमा ७८८ जनाको शव फेला परेको छ। भेटिएका शवमध्ये सबैभन्दा बढी चितवनमा २६४ जनाको रहेको छ।
यसबाहेक रसुवामा १३, धादिङमा ५०, गोरखामा ५८, नवलपरासी पूर्वमा १९४, नुवाकोटमा ५२, तनहुँमा ३७ र नवलपरासी पश्चिममा १२० जनाको शव भेटिएको छ।
बाढी तथा त्यसबाट प्रभावित क्षेत्रमा नेपाल प्रहरीलगायत विभिन्न सुरक्षा निकाय खोज तथा उद्धारमा परिचालन भइरहेका छन्। प्रहरीले हालसम्म २ हजार ७४२ जनाको उद्धार गरिएको जनाएको छ।
शवलाई चिस्यानमा राख्नु भनेको ‘फ्रिजर’ मा राख्नु मात्रै नभएको मन्त्री गौतमको तर्क छ। ‘त्यसका लागि पर्याप्त ठाउँ, उपयुक्त तापक्रम, निरन्तर विद्युत् आपूर्ति, वैकल्पिक विद्युत्, सुरक्षित ढुवानी र नियमित निगरानी आवश्यक हुन्छ। तर बाढी प्रभावित क्षेत्रमा सडक, विद्युत् र अन्य पूर्वाधार नै प्रभावित भएकाले यस्तो व्यवस्थापन निरन्तर कायम राख्न कठिन हुन्छ,’ उनी भन्छिन्।
उनले तीन–चार दिनसम्म पानी र लेदोमा रहेका कतिपय शव फुलेर कुहिन थालेको र अनुहार हेरेर पहिचान गर्न कठिन हुँदै गएको बताएकी छन्। यस्तो अवस्थामा शरीरको अवस्था र औँठाछापका रेखा बिग्रिने भएकाले बायोमेट्रिकबाट पहिचान गर्नसमेत कठिन हुन सक्ने उनले उल्लेख गरेकी छन्।
गौतमले भने डीएनए वा अन्य विश्वसनीय विधिबाट पहिचान गरी परिवारको जिम्मा नलगाउँदासम्म शवलाई सुरक्षित राख्नुपर्ने अपेक्षा स्वाभाविक भएको बताएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
