काठमाडौं– रसुवाको भोटेकोशी नदीमा आएको भीषण बाढी तथा त्यसबाट प्रभावित विभिन्न जिल्लामा हालसम्म ७३४ जनाको शव फेला परेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार रसुवामा १३, नुवाकोटमा ५२, धादिङमा ५०, गोरखामा ५८, तनहुँमा ३६, चितवनमा २५९, नवलपरासी पूर्वमा १८४ र नवलपरासी पश्चिममा ८२ जनाको शव फेला परेको हो।
बाढीपछि विभिन्न स्थानमा खोजी तथा उद्धार कार्यलाई तीव्रता दिइएको छ। नेपाली सेना, नेपाल प्रहरी, सशस्त्र प्रहरी बल तथा स्थानीय उद्धार टोली परिचालन गरिएका छन्। हेलिकप्टरमार्फत प्रभावित क्षेत्रबाट उद्धार गर्ने तथा राहत सामग्री पुर्याउने कामसमेत भइरहेको प्राधिकरणले जनाएको छ।
यद्यपि, ठूलो संख्यामा मानिस अझै सम्पर्कविहीन छन्। सम्पर्कविहीनमध्ये नेपाली सेना, नेपाल प्रहरी, सशस्त्र प्रहरी, भन्सार तथा अध्यागमनका कर्मचारीसहित विदेशी नागरिक र विदेशमा बस्ने नेपालीसमेत रहेका छन्।
हालसम्म प्रहरीका २७, सेनाका ४५, सशस्त्रका १३, भन्सारका १५, अध्यागनका ४, रसुवा जिल्लाबाट ५६२ र नुवाकोटबाट ११५, जलविद्युत आयोजनाबाट ९३३, मकवानपुरबाट ५६, विदेशी नागरिक ५८९, विदेशीसँगै घुम्न गएका नेपाली १२७ र लाङटाङ निकुञ्जबाट ३ गरी २ हजार ४८९ जना बेपत्ता छन्।
यस्तै, ८ हजार १८६ जनाको उद्धार गरिएको छ। त्यसमा २४२ जना उपचाररत र डिस्चार्ज भइसकेको प्राधिकरणले जनाएको छ।
बाढीबाट प्रभावितलाई सुरक्षित स्थानमा सार्नुका साथै खाद्यान्न, खानेपानी, औषधि, लत्ताकपडा तथा अन्य अत्यावश्यक राहत सामग्री वितरण भइरहेको प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
