रसुवा– भोटेकोशी नदीमा आइतबार बिहान आएको बाढीपछि जलसतह घटेर सामान्यतर्फ फर्किएको छ।
बिहान करिब ३ः३० बजेतिर ठूलो आवाजसहित नदीमा बाढी आएपछि सम्भावित जोखिमलाई मध्यनजर गर्दै धुञ्चेका स्थानीयवासी सुरक्षित स्थानमा भेला भएका थिए। नदीतटभन्दा माथि रहेको अस्पताल क्षेत्र तथा खेलमैदानमा स्थानीयवासी एकीकृत भएर बसेका थिए।
केही समयपछि नदीको बहाव र जलसतह घट्न थालेपछि स्थानीयवासी आआफ्नो घरतर्फ फर्किन थालेका छन्। तत्कालका लागि अवस्था नियन्त्रणमा रहेको र थप जोखिम नदेखिएको गोसाइँकुण्ड गाविसका प्रमुख कैसाङनुर्पु तामाङले जानकारी दिए।
बाढी आएको जानकारी प्राप्त भएपछि रसुवा प्रशासनले छिमेकी जिल्ला नुवाकोट र धादिङ प्रशासनसँग समन्वय गरेको थियो। यी दुई प्रशासनले समेत सम्भावित जोखिमलाई ध्यानमा राख्दै नदी तटीय क्षेत्रमा सावधानी अपनाउन माइकिङ गरेका थिए।
आपत्कालीन अवस्थाका लागि धुञ्चेमा राखिएको नेपाली सेनाको हेलिकप्टरसमेत माथिल्लो नदी तटीय क्षेत्रतर्फ पठाइएको छ। बाढीका कारण भएको सम्भावित क्षतिको विस्तृत विवरण भने प्राप्त हुन बाँकी रहेको प्रशासनले जनाएको छ।
यसअघि भदौ १० गते आएको बाढीबाट प्रभावित रसुवा, नुवाकोटसहित तल्लो तटीय क्षेत्रका बासिन्दा पुनः बाढी आएपछि त्रसित भएका थिए। तर, अहिले जलसतह घट्दै गएपछि तत्कालका लागि स्थानीयवासीमा रहेको त्रास केही कम भएको छ।
प्रशासनले भने नदीको जलसतह घटे पनि तटीय क्षेत्रका बासिन्दालाई केही समय सतर्क रहन र जोखिमयुक्त स्थानमा नजान आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
-1786513116.png)
