काठमाडौं– जल तथा मौसम विज्ञान विभागअन्तर्गतको बाढी पूर्वानुमान महाशाखाले रसुवा, नुवाकोट र धादिङका नदी आसपासका क्षेत्रमा तत्काल ठूलो बाढीको जोखिम नरहेको स्पष्ट पारेको छ।
महाशाखाले आज बिहान ५:४५ बजे अद्यावधिक सूचना जारी गर्दै जिल्ला प्रहरी कार्यालय रसुवाबाट प्राप्त पछिल्लो जानकारीका आधारमा भोटेकोशी नदीलगायत आसपासका क्षेत्रमा तत्काल ठूलो बाढीको खतरा नरहेको जनाएको हो।
यसअघि जिल्ला प्रशासन कार्यालय, रसुवाले भोटेकोशी नदीमा बाढीको बहाव बढेको आवाज सुनिएको भन्दै सूचना जारी गरेको थियो। उक्त सूचनापछि नदी किनरानजिकका बासिन्दा सुरक्षित स्थानतर्फ निस्किएका थिए।
तर, बाढी पूर्वानुमान महाशाखाले पछिल्लो अवस्थाको विश्लेषण गर्दै तत्काल ठूलो बाढीको खतरा नरहेको जनाएको छ। ‘नदी आसपासको अवस्थालाई निरन्तर निगरानीमा राखिएको छ,’ महाशाखाले भनेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले भने रसुवा, नुवाकोट र धादिङका नदी आसपासका क्षेत्रमा उच्च सतर्कता अपनाउन आग्रह गरेको छ।
प्राधिकरणका अनुसार भोटेकोशी नदी आसपासको जोखिम अवस्था निगरानीमा राखिएको छ। नदीको बहाव बढ्न सक्ने सम्भावनालाई मध्यनजर गर्दै स्थानीय बासिन्दा तथा नदी किनार आसपासमा रहेका सबैलाई आवश्यक सावधानी अपनाउन अनुरोध गरिएको छ।
सम्बन्धित निकायले नदीको बहावमा असामान्य वृद्धि भएमा सुरक्षित स्थानमा जान तथा आधिकारिक सूचनालाई मात्र आधार बनाउन आग्रह गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
