काठमाडौं – भोटेकोशीको विनाशकारी बाढीमा परी बगेर चितवन पुर्याएका तर पहिचान हुन नसकेका शवहरूको जमिनमुनि व्यवस्थापन शुरु भएको छ।
बुधबारदेखि बाढीमा बगेका शवहरू शनिबारसम्म पहिचान हुन नसकेपछि गाड्न लागेको हो।
चितवनमा भेटिएका २३३ शवमध्ये शनिबार दिउँसोसम्म ६ जनाको पहिचान भएको छ। बाँकी शवहरू प्रशासनले बैठक बसेरै निर्णय गरी गाड्न लागेको हो।
शव भरतपुर महानगरपालिका–१ स्थित रामनगर–देवघाट सडकमा रहेको जंगल क्षेत्रमा गाडिने छ।
त्यहाँ सुरक्षाकर्मीको उपस्थितीमा दुइटा डोजर प्रयोग गरी जंगलको बीच भागमा खाल्डो बनाइएको छ।
गाड्नुअघि सबै शवहरुको डिएनए नमुना लिइएको थियो। सो आधारमा शव चिन्ने संकेत राखिने छ।
जिल्ला प्रहरी कार्यालय चितवनका प्रमुख, प्रहरी उपरीक्षक रामेश्वर पौडेलका अनुसार हालसम्म चितवनमा २३३ वटा शव सङ्कलन भएका छन्। तीमध्ये ६ वटा शव पहिचान भई आफन्तलाई हस्तान्तरण गरिसकिएको छ भने बाँकी शवहरू अत्यधिक सडेगलेको र दुर्गन्धित भई चिन्न नसकिने अवस्थामा पुगेपछि सुरक्षित रूपमा जमिनमुनि व्यवस्थापन गर्न लागिएको हो।
एसपी पौडेलका अनुसार शव गाड्नुअघि प्रत्येक शवको डीएनए नमुना संकलन गरी प्रोफाइलिङ गरिएको छ। शनिबार दिउँसोसम्म १०० भन्दा बढी शवको डीएनए प्रोफाइलिङ पूरा भएको थियो।
शवहरू करिब १.५ मिटर गहिरो खाडलमा एकअर्काबीच ४० सेन्टिमिटर दूरी कायम गरी राखिनेछ। प्रत्येक शव वा शवका टुक्रालाई विशेष ब्यागमा प्याक गरी पहिचान नम्बरसमेत राखिएको छ।
कंक्रिटको स्ट्यान्ड र सङ्केत नम्बर: शव पुरिसकेपछि भविष्यमा खन्न सजिलो होस् भनेर शवको ठीक माथि नभई अलिकति छेउ मा सानो कंक्रिटको ढलान गरी एउटा स्ट्यान्ड बनाइन्छ। गाडिएको स्थानमा संकेत नम्बर राख्नुका साथै फोटो, भिडियो र जीपीएस लोकेसनसहितको विवरण सुरक्षित गरिनेछ। शव गाडिएको क्षेत्रलाई घेराबन्दीसमेत गरिने प्रहरीले जनाएको छ।
बेपत्ता व्यक्तिका आफन्तले सम्बन्धित जिल्ला अस्पतालमा डीएनए नमुना दिन सक्नेछन्। उक्त नमुना चितवनमा राखिएको शवको डीएनएसँग मिलेमा प्रहरीले आफन्तलाई खबर गर्नेछ। त्यसपछि संकेत नम्बर र जीपीएस विवरणका आधारमा शव पहिचान गरी प्रहरीको रोहवरमा निकालेर अन्तिम संस्कारका लागि आफन्तलाई बुझाइनेछ।
प्रशासनले बाध्यात्मक परिस्थितिका कारण शव गाड्नुपरेको भन्दै सहयोग र समन्वयका लागि आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
