काठमाडौं– लगातारको वर्षाका कारण देशका विभिन्न स्थानमा सडक अवरुद्ध भएका छन् भने केही मुख्य सडकखण्डमा रातिको समयमा सवारी आवागमनमा रोक लगाइएको छ।
बाढी, पहिरो, सडक कटान तथा हिलोका कारण काभ्रे, सिन्धुली, मकवानपुर, नुवाकोट, इलाम, रसुवा, रुकुम पश्चिम, धादिङ, सिन्धुपाल्चोक र रोल्पाका सडक प्रभावित भएको प्रहरीले जनाएको छ।
काभ्रेपलाञ्चोक र सिन्धुली जोड्ने खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै साँझ ६ बजेदेखि बिहान ४ बजेसम्म सम्पूर्ण सवारी साधनको आवतजावत रोक लगाइएको छ। बिहान ४ बजेदेखि साँझ ६ बजेसम्म भने यातायात सञ्चालन गर्न दिइने प्रहरीले जनाएको छ।
त्यस्तै, मकवानपुरको कान्ति लोकपथमा वर्षाका कारण रातिको समयमा सबै प्रकारका सवारी साधनको आवतजावतमा रोक लगाइएको छ। साँझ ५ बजेदेखि बिहान ५ बजेसम्म सवारी सञ्चालन गर्न नपाइने व्यवस्था गरिएको छ।
नुवाकोटको टोखा–छहरे सडकखण्डमा पनि अत्यावश्यक सेवाका सवारीबाहेक अन्य सार्वजनिक तथा निजी सवारी साधनलाई राति १० बजेदेखि बिहान ५ बजेसम्म सञ्चालनमा रोक लगाइएको छ।
वर्षाका कारण इलाम नगरपालिका–९ राजदुवालीस्थित मेची राजमार्गमा सडक हिलाम्य भएपछि सवारी आवागमन पूर्ण रूपमा अवरुद्ध भएको छ। उक्त स्थानमा वैकल्पिक सडक भने रहेको प्रहरीले जनाएको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडकखण्ड पनि त्रिशूली नदीले सडकको तल्लो भाग कटान गरेपछि पूर्ण रूपमा अवरुद्ध भएको छ। यस्तै, रुकुम पश्चिमको आठबिसकोट नगरपालिका–६ रिजेगार्ड खोलास्थित भेरी करिडोर जाजरकोट–डोल्पा सडकखण्डमा सडक माथिबाट ढुङ्गा, माटो र लेदोसहितको पहिरो आएपछि यातायात ठप्प भएको छ।
रसुवाको सीमावर्ती क्षेत्रमा आएको अप्रत्याशित बाढीलाई मध्यनजर गर्दै पृथ्वीराजमार्गअन्तर्गत गल्छी–स्याफ्रुबेँसी तथा मुग्लिन–नारायणगढ सडकखण्डलगायत त्रिशूली नदी आसपासका सडकमा समेत अर्को आदेश नभएसम्म आवतजावत रोक लगाइएको जनाइएको छ।
बाढीका कारण धादिङमा पृथ्वीराजमार्गका ज्वाङखोला, बिहानी पम्प, गलौदी, जहरेखेत–बाङ्गेमोड तथा बैरेनी क्षेत्रमा सडक प्रभावित भएका थिए। तीमध्ये केही स्थानमा लेदो हटाउने काम भइरहेको छ भने गलौदीमा मेसिन पुग्न नसकेको प्रहरीले जनाएको छ। धादिङका प्रभावित सडकखण्डहरूमा हाल एकतर्फी यातायात भने सञ्चालनमा आएको छ।
सिन्धुपाल्चोकको भोटेकोशी गाउँपालिका–२ कोदारीस्थित अरनिको राजमार्गमा पर्ने ईकु क्षेत्रमा सडक भासिएपछि राजमार्ग पूर्ण रूपमा अवरुद्ध भएको छ। त्यस्तै, रोल्पाको परिवर्तन गाउँपालिका–४ खरिबोटस्थित शहीद राजमार्गमा अविरल वर्षाका कारण सडक माथिबाट ढुङ्गा–माटोसहित पहिरो खसेपछि सडक पूर्ण रूपमा अवरुद्ध भएको छ।
वर्षा अझै जारी रहेकाले सडकमा पहिरो, बाढी र कटानको जोखिम कायमै रहेको भन्दै सम्बन्धित निकायले यात्रुलाई आवश्यक सतर्कता अपनाउन प्रहरीले आग्रह गरेको छ। प्रभावित सडकखण्डमा यात्रा गर्नुअघि सडकको अवस्था बुझेर मात्र यात्रा गर्न सुझाव दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
