काठमाडौं– रसुवामा आएको बाढीपछि सरकारले उद्धार तथा राहतका लागि सुरक्षा निकायसहित राज्यका विभिन्न संयन्त्रलाई परिचालन गरेको छ।
प्रधानमन्त्री बालेन शाहले रसुवा बाढीको अवस्थाबारे जानकारी दिँदै नेपाली सेना, सशस्त्र प्रहरी बल र नेपाल प्रहरीलाई उद्धार तथा राहत कार्यमा परिचालन गरिएको बताएका छन्। उनका अनुसार अन्य जिल्लाबाट समेत थप जनशक्ति प्रभावित क्षेत्रतर्फ पठाइसकिएको छ।
विपद् व्यवस्थापन प्राधिकरणलाई सक्रिय बनाउँदै मेडिकल टोली, नेपाल स्काउट तथा रेडक्रसलगायतका संस्थासँग समन्वय गरी आवश्यक कदम चाल्न निर्देशन दिइएको छ। प्रभावित क्षेत्रमा थप एम्बुलेन्स तथा मेडिकल जनशक्ति पठाउने प्रक्रिया पनि अघि बढाइएको उनले बताएका छन्।
बाढीको जोखिममा रहेका तल्लो तटीय क्षेत्रका बासिन्दालाई तत्काल सुरक्षित स्थानमा स्थानान्तरण गर्न सम्बन्धित प्रमुख जिल्ला अधिकारीहरूलाई निर्देशन दिइएको छ। स्थानीय बासिन्दालाई एसएमएस तथा फोनमार्फत समेत जोखिमबारे जानकारी गराउँदै सुरक्षित स्थानमा जान आग्रह गरिएको छ।
सम्भावित उद्धार तथा राहतका लागि सबै हेलिकप्टरलाई स्ट्यान्डबाइमा राख्न निर्देशन दिइएको छ। निजी हेलिकप्टर कम्पनीहरूलाई समेत आवश्यक परे तत्काल परिचालन गर्न सकिने गरी हेलिकप्टर तयारी अवस्थामा राख्न भनिएको छ।
बाढीपछिको अवस्था तथा आगामी आवश्यक कदमबारे निर्णय लिन केही बेरमै उच्चस्तरीय बैठक बोलाइएको पनि प्रधानमन्त्री शाहले बताएका छन्।
उनले प्रभावित तथा जोखिममा रहेका सबैलाई सुरक्षित स्थानमा बस्न आग्रह गर्दै आफन्तसँग सम्पर्क हुन नसकेको अवस्थामा सम्बन्धित निकायबाट जारी हुने उद्धार तथा राहतसम्बन्धी आधिकारिक अपडेट पर्खिन अनुरोध गरेका छन्।
थप जानकारी तथा राहतसम्बन्धी सूचनाका लागि १२३४/ १०० नम्बरमा सम्पर्क गर्न सकिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787722236.png)
-1786602170.png)
-1786513116.png)
