काठमाडौं– अफगानिस्तानले तेस्रो एकदिवसीय खेलमा आयरल्यान्डलाई तीन विकेटले पराजित गर्दै सन् २०२७ मा हुने एकदिवसीय विश्वकपमा स्थान पक्का गरेको छ।
बेलफास्टमा सोमबार भएको खेलमा टस जितेर पहिले बलिङ गरेको अफगानिस्तानले आयरल्यान्डलाई ४६.३ ओभरमा २०६ रनमा अलआउट गरेको थियो। जवाफमा अफगानिस्तानले ४४.५ ओभरमा सात विकेट गुमाउँदै लक्ष्य पूरा गर्यो।
अफगानिस्तानको जितमा राशिद खानले महत्त्वपूर्ण भूमिका खेले। उनले अविजित ३७ रन बनाउनुका साथै बलिङतर्फ तीन विकेट लिए।
अफगानिस्तान एकदिवसीय वरीयतामा हाल आठौं स्थानमा छ। आयरल्यान्डविरुद्धको यो उसको लगातार दोस्रो जित हो। यो जितसँगै अफगानिस्तान सन् २०२६ सेप्टेम्बर ३० सम्म एकदिवसीय वरीयताको शीर्ष आठमा रहने पक्का भएको छ। यही मिति सन् २०२७ को एकदिवसीय विश्वकपमा सिधै छनोट हुने टोली निर्धारण गर्ने कटअफ हो।
अफगानिस्तान सिधै विश्वकपमा छनोट भएपछि वेस्ट इन्डिजले विश्वकप छनोट खेल्नुपर्ने भएको छ।
वेस्ट इन्डिजले भारतसँग दुई एकदिवसीय खेल खेल्न बाँकी छ। ती दुवै खेल जिते पनि वरीयताको शीर्ष आठमा पुग्न भने वेस्ट इन्डिज असफल हुनेछ। वेस्ट इन्डिज हाल १०औँ स्थानमा छ।
अन्तर्राष्ट्रिय क्रिकेट परिषद् (आईसीसी) का अनुसार सन् २०२७ मा हुने पुरुष विश्वकपमा १४ टोलीले सहभागिता जनाउनेछन्। सन् २०२३ को विश्वकपमा भने १० टोली सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
