काठमाडौँ– कृषि, वन तथा पर्यावरण मन्त्री गीता चौधरी र संयुक्त राष्ट्रसंघीय खाद्य तथा कृषि संगठन (एफएओ) की दक्षिण तथा त्रिपक्षीय सहयोग महाशाखाकी निर्देशक एवं महानिर्देशक कार्यालयकी क्याबिनेट उपनिर्देशक हुआ याङबीच कृषि क्षेत्रको सुधार र सहकार्य विस्तारका विषयमा छलफल भएको छ।
मंगलबार मन्त्रालयमा भएको भेटवार्ताका क्रममा नेपालमा खाद्य सुरक्षाको अवस्था सुधार, कृषि प्रणालीको आधुनिकीकरण, दिगो कृषि-खाद्य प्रणाली निर्माण तथा दक्षिण-दक्षिण र त्रिपक्षीय सहयोगका सम्भावनाबारे विचार आदानप्रदान भएको मन्त्रालयले जनाएको छ।
भेटमा मन्त्री चौधरीले कृषि क्षेत्रको रूपान्तरण, खाद्य सुरक्षाको दीर्घकालीन सुनिश्चितता तथा अन्तर्राष्ट्रिय सहयोग र लगानी परिचालनका लागि एफएओसँगको साझेदारीलाई थप प्रभावकारी बनाउन नेपाल इच्छुक रहेको बताइन्।
छलफलका क्रममा सीमापार पशुरोग नियन्त्रण, जलवायु परिवर्तन अनुकूल कृषि प्रविधिको विकास तथा कृषि अनुसन्धान र प्रयोगशालाको क्षमता विस्तारका विषयलाई प्राथमिकताका साथ उठाइएको थियो।
त्यसैगरी, अन्तर्राष्ट्रिय मापदण्डअनुसारका कृषि प्रयोगशाला स्थापना, उच्च मूल्यका कृषि उत्पादनको निर्यात प्रवर्द्धन तथा भौगोलिक संकेत (जिआइ) सम्बन्धी कानुनी र संस्थागत संरचना सुदृढ बनाउने विषयमा पनि छलफल भएको जनाइएको छ।
एफएओकी उपनिर्देशक हुआ वाङले दक्षिण-दक्षिण तथा त्रिपक्षीय सहयोग महाशाखाको नेतृत्व सम्हालेपछि नेपालसँगको सहकार्यलाई प्राथमिकतामा राखेर अघि बढ्ने प्रतिबद्धता व्यक्त गरिन्।
उनले कृषि विज्ञान, अनुसन्धान तथा नवप्रवर्तनसँग सम्बन्धित आगामी अन्तर्राष्ट्रिय कार्यक्रमहरूमा नेपालको सहभागिताका लागि अवसर उपलब्ध गराउने जानकारी दिँदै रोमस्थित एफएओ मुख्यालयमा आयोजना हुने कार्यक्रमहरूमा समेत नेपालको सहभागिताका लागि निमन्त्रणा दिइन्।
भेटवार्तामा नेपाल सरकार र एफएओबीचको सहकार्यलाई थप सुदृढ गर्दै समावेशी, दिगो र जोखिम सामना गर्न सक्ने कृषि तथा खाद्य प्रणाली विकासमा साझेदारी विस्तार गर्ने सहमति भएको मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
