काठमाडौँ– नेकपा (एमाले) का उपाध्यक्ष विष्णु पौडेलले पछिल्लो प्रतिनिधि सभा निर्वाचनको परिणामले नेपालको कम्युनिस्ट आन्दोलनलाई गम्भीर प्रभाव पारेको बताएका छन्।
सदस्यता नवीकरणसम्बन्धी कार्यशालामा बोल्दै उनले हालको अवस्था कम्युनिस्ट आन्दोलनका लागि चुनौतीपूर्ण रहेको उल्लेख गर्दै आन्दोलनको भविष्यप्रति विभिन्न कोणबाट शंका र टिप्पणीहरू भइरहेका बताए। उनका अनुसार निर्वाचन परिणामपछि कतिपयले नेपालको कम्युनिस्ट आन्दोलन कमजोर बन्दै गएको वा पुनः सशक्त रूपमा अघि बढ्न नसक्ने आकलनसमेत गरेका छन्।
पौडेलले नेपालको कम्युनिस्ट आन्दोलनको दीर्घ इतिहासलाई आधार मानेर मूल्यांकन गर्दा हालको पराजय र क्षति विगतका तुलनामा अत्यन्त गम्भीर रहेको धारणा व्यक्त गरे। उनले यस अवस्थालाई आन्दोलनले भोगेको सबैभन्दा ठुलो झट्कामध्ये एकका रूपमा चित्रण गरे।
उनले पार्टी र जनताबीचको सम्बन्ध कमजोर भएको तथ्यलाई पनि स्वीकार गर्दै जनआधारसँगको दूरी कम गर्नु अहिलेको प्रमुख आवश्यकता भएको बताए। उनका अनुसार आन्दोलनलाई पुनर्जीवित गर्न जनता, पार्टी कार्यकर्ता तथा राष्ट्रिय हितका सवालसँग पुनः निकट सम्बन्ध स्थापित गर्नुपर्ने आवश्यकता छ।
पौडेलले वर्तमान अवस्थाबाट पाठ सिक्दै संगठनात्मक तथा राजनीतिक रूपमा पुनर्संरचना गर्ने प्रतिबद्धता व्यक्त गरे। उनले चुनौतीपूर्ण परिस्थितिलाई पार गर्दै आन्दोलनलाई पुनः सशक्त बनाउने, कार्यकर्ता र नागरिकसँगको सम्बन्ध सुदृढ गर्ने तथा आगामी दिनमा नयाँ ऊर्जा सहित अघि बढ्ने लक्ष्य पार्टीले लिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786272400.jpg)
-1764146706.png)
-1786157138.png)
-1786184812.png)
