काठमाडौं– मधेश प्रदेशका मुख्यमन्त्री कृष्णप्रसाद यादवले दोस्रोपटक विश्वासको मत प्राप्त गरेका छन् ।
सत्ता गठबन्धनमा रहेको जनमत पार्टीले समर्थन फिर्ता लिएपछि संवैधानिक व्यवस्थाअनुसार उनले दोस्रोपटक प्रदेशसभामा विश्वासको मत लिएका हुन् ।
प्रदेशसभामा उपस्थित १ सय सांसदमध्ये मुख्यमन्त्री यादवको पक्षमा ६२ मत परेको छ भने विपक्षमा ३६ मत परेको सभामुख रामअशिष यादवले जानकारी दिएका छन् । मुख्यमन्त्री यादवले संविधानको धारा १८८ को उपधारा २ बमोजिम विश्वासको मत लिएका हुन् ।
मुख्यमन्त्री यादवलाई नेपाल कम्युनिस्ट पार्टी (एमाले), नेपाल कम्युनिस्ट पार्टी (नेकपा) तथा नेपाल संघीय समाजवादी पार्टीले समर्थन गरेका छन् । गत मंसिरमा सात दलको समर्थनमा तत्कालीन एमाले नेतृत्वको सरकार ढालेर नेपाली कांग्रेस संसदीय दलका नेता यादव मुख्यमन्त्री बनेका थिए । तर, सरकार गठन भएको ६ महिनामै फेरि एमालेकै समर्थनमा उनले आफ्नो नेतृत्वको सरकार जोगाउन सफल भएका हुन् ।
यसअघि सत्ता गठबन्धनकै प्रमुख सहयोगी दल जसपाले कांग्रेस नेतृत्वको सरकार ढाल्ने प्रयास गरेपछि १ जेठमा तय गरिएको विश्वासको मत अन्तिम समयमा स्थगित गरिएको थियो । त्यसपछि केन्द्रमा कांग्रेस, एमाले र नेकपाबीच बनेको नयाँ गठबन्धनको प्रभाव मधेश प्रदेशमा पनि परेको छ ।
विश्वासको मतअघि बिहीबार राति मुख्यमन्त्री यादवले जसपाका तीन मन्त्रीलाई बर्खास्त गर्दै एमालेका मोहम्मद समिरलाई बिनाविभागीय मन्त्रीका रूपमा शपथ गराएका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779449565.png)
-1764146706.png)
