काठमाडौं– नेपाली कांग्रेसका सभापति गगन थापाले हिजोको केपी ओली सरकारको पालामा नै वालेन्द्र शाह नेतृत्वको सरकार भ्रममा रहेको बताएका छन् ।
संसदीय दलको कार्यालय सिंहदरबारमा सञ्चारकर्मीसँग बोल्दै थापाले ओलीको जस्तै भ्रमबाट सरकार मुक्त हुनुपर्ने उनले बताएका हुन् ।
‘केपी ओलीजीलाई तपाईं भ्रममा हुनुहुन्छ भनेर सम्झाएको थिएँ । दुई तिहाइ छ भनेर भ्रममा पर्न हुँदैन । सरकार दुई तिहाइ वा बहुमतले नै हुने हो भनेर सम्झाएको थिएँ,’ थापाले भने, ‘दुई तिहाइ छ मैले के गरे पनि हुन्छ । जे कानुन बनाए पनि हुन्छ भन्ने भ्रमले तपाईंलाई डुबाउँछ भनेको थिएँ । यो सरकार पनि त्यस्तै भ्रममा छ ।’
कानुन र विधिको शासनभन्दा माथि कानुन बनाउन नहुने उनले बताए । ‘सरकार जहिल्यै बहुमतमा हुन्छ । बहुमतले कानुन बनाउन पाउँछ । कानुनको कसरी प्रयोग गर्ने भन्नेमा सरकारको ख्याल पुगेको छैन । तर अध्यादेश ल्याउनै पाइँदैन भनेर उठाउने कुरा उपयुक्त होइन । हिजो हामीले पनि ल्याएको थियौं,’ थापाले भने, ‘अध्यादेश के को लागि कुन नियतले ल्याएको भन्ने कुरामा जोडिन्छ । प्रत्येक अध्यादेश संसदमा आइसकेपछि भोलि प्रतिस्थापन विधेयकमा रुपमा आउँदा कुन विषय संविधानसम्मत छ । कुन छैन जाँच्ने काम संसदको हो । संवैधानिक परिषद्सम्बन्धी व्यस्थामा हाम्रो आपत्ति छ । यो कुरा संविधानमा किन राखियो भनेर हेर्नुपर्छ ।’
प्रधानन्ययाधीश वरिष्ठलाई बनाउनुको सट्टा आफ्नो खल्तीबाट बनाउने प्रक्रियामा अघि बढे दुर्भाग्य हुने उनको भनाइ छ ।
‘संवैधानिक परिषद्मा प्रधानमन्त्री, सभामुख, भोलि कानुनमन्त्री सहभागी हुने अनि खल्तीबाट झिकेको नामलाई प्रधानन्यायाधीश बनाउन खोजिएको छ । संसद अधिवेशन स्थगित, अध्यादेशको प्रपञ्च गरिएको छ,’ थापाले भने, ‘यसअघि आफ्नो मान्छे नियुक्त गर्नै जालझेल गरे । अहिलेको प्रधानमन्त्रीले पनि त्यस्तै गर्दै हुनुहुन्छ । यस्तो हुँदा हिजो र आजको के फरक भयो ?’ अव्यवस्थित बसोबासीलाई हटाउने नाममा अमानवीय व्यवहार गरिएकोमा पनि थापाले आपत्ति जनाए ।
बुद्धपूर्णिमाको दिन गुम्बा भत्काउने, सुत्केरी, अपागंता भएका व्यक्तिलाई बस्तीबाट लखेट्ने र डोजर आतंक चलाउने शैलीमा कांग्रेसको असहमति भएको उनको भनाइ छ । तर सरकारले अगाडि सारेका सुशासनका सवालमा समर्थन रहेको उनको भनाइ छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
