बारा– बाराको जितपुरसिमरा उपमहानगरपालिका–१६ काटघाट क्षेत्रमा जङ्गली हात्तीको आक्रमणबाट ट्रक चालकको घटनास्थलमै मृत्यु भएको छ।
जिल्ला प्रहरी कार्यालय बाराका अनुसार आज बिहान पूर्व–पश्चिम राजमार्गको बीच बाटोमा हात्ती अचानक सडकमा आइपरेर सवारीसाधनहरूमा आक्रमण गरेको थियो। सो क्रममा ना.४ ख १८३० नम्बरको ट्रकका चालक जितपुरसिमरा उपमहानगरपालिका–१ निवासी करिब ४० वर्षका राजकुमार चौधरी हात्तीको आक्रमणमा परेका हुन्।
प्रहरीका अनुसार हात्तीको आक्रमणपछि चौधरी ट्रकबाट उत्रेर भाग्ने क्रममा राजमार्गदेखि करिब १०० मिटर दक्षिणतर्फको जंगलमा पुगेका थिए। त्यही क्रममा हात्तीले आक्रमण गर्दा उनको घटनास्थलमै मृत्यु भएको हो।
घटनाको जानकारी पाएलगत्तै इलाका प्रहरी कार्यालय निजगढबाट प्रहरी निरीक्षक जीवन लामिछानेको कमान्डमा सात जनाको टोली घटनास्थल पुगेको जिल्ला प्रहरी कार्यालय बाराका निमित्त प्रवक्ता प्रहरी निरीक्षक खेमप्रसाद नेपालले जानकारी दिएका छन्।
हाल हात्तीलाई जंगलतर्फ धपाउने कार्य जारी रहेको र अन्य केही सवारीसाधनमा पनि क्षति पुगेको प्रहरीले जनाएको छ। घटनाको विस्तृत विवरण संकलन भइरहेको प्रहरीले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790066546.png)
-1790064844.png)
-1786602170.png)
-1789631269.jpg)
