एजेन्सी– अमेरिकी विदेश मन्त्रालयले अमेरिकी कानून उल्लंघन गर्ने र निर्धारित अवधिबाट बढी समय बस्ने ६ हजारभन्दा बढी विदेशी विद्यार्थीको भिसा रद्द गरेको छ।
मन्त्रालयका अनुसार यीमध्ये धेरैजसो लागूपदार्थ सेवन गरी गाडी चलाउने, चोरी तथा आपराधिक घटनामा संलग्न रहेको बताइएको छ।
अमेरिकी विदेश मन्त्रालयका अनुसार ६ हजार भिसामध्ये ४ हजार भिसा कानून उल्लंघनका कारण रद्द गरिएका छन्। त्यसैगरी, २०० देखि ३ सय भिसा आईएनए-थ्रीबी अनुसार आतंकवादसँग जोडिएको घटनाका कारण रद्द गरेको विदेश मन्त्रालयले जनाएको छ।
मन्त्रालयका अनुसार, भिसा रद्द गरिएका अधिकांश विद्यार्थीहरू मदिरा सेवन गरी सवारी चलाउने, चोरी गर्ने तथा आतंकवादलाई समर्थन गर्ने जस्ता गम्भीर गतिविधिमा संलग्न पाइएका थिए। यो कदमलाई ट्रम्प प्रशासनले अख्तियार गरेको कडा आप्रवासन नीतिको कार्यान्वयनको परिणामका रूपमा हेरिएको छ, जसअन्तर्गत अन्तर्राष्ट्रिय विद्यार्थीहरूमाथि पनि निगरानी र कडाइ बढाइएको छ।
यो कदम ट्रम्प प्रशासनको कडा आप्रवासी नीति अन्तर्गत आएको हो, जसअन्तर्गत विदेशी विद्यार्थीसँग पनि कडा व्यवहार गरिएको बीबीसीले जनाएको छ।
विशेषगरी, ‘आतंकवादलाई समर्थन’ भन्ने शब्दावलीको परिभाषा भने विदेश मन्त्रालयले स्पष्ट पारेको छैन, जसले गर्दा यो निर्णय विवादमा तानिएको छ। यसअघि ट्रम्प प्रशासनले प्यालेस्टाइनको समर्थनमा प्रदर्शन गर्ने केही विद्यार्थीहरूलाई ‘यहुदी–विरोधी’ व्यवहार गरेको आरोप लगाउँदै कारबाही गरेको थियो, जसले गर्दा यस्तो कारबाही अभिव्यक्ति स्वतन्त्रतामाथिको प्रहार हुन सक्ने भन्दै आलोचना समेत भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
