एजेन्सी– सुपरस्टार म्याडोनाले पोप लियो चौधौंलाई तत्काल गाजाको यात्रा गर्न र त्यहाँका बालबालिकाको जीवनरक्षा गर्न आग्रह गरेकी छन् ।
सोमबार सामाजिक सञ्जालमा अपिल पोस्ट गर्दै उनले पोपलाई त्यस्तो आग्रह गरेकी हुन् ।
छोरा रोक्कोको जन्मदिनले उनलाई त्यो पोस्ट गर्न प्रेरित गरेको समेत म्याडोनाले उल्लेख गरेकी छन् ।रोक्को सोमबार २५ वर्षका लागेका छन् । ‘परम आदरणीय फादर, कृपया गाजामा जानुहोस् र धेरै ढिलो हुनुभन्दा पहिले बच्चाहरूको रक्षा गर्नुहोस् । आमाको रूपमा, म उनीहरूको पीडा हेर्न सक्दिनँ,’ म्याडोनाले लेखेकी छन् ।
‘संसारका बच्चाहरू सबैका हुन् । तपाईं हामीमध्ये एकमात्र हुनुहुन्छ, जसलाई प्रवेशबाट वञ्चित गर्न सकिँदैन,’ उनले लेखेकी छन्, ‘हामीलाई यी निर्दोष बच्चाहरूलाई बचाउन मानवीय ढोकाहरू पूर्ण रूपमा खोल्न आवश्यक छ । अब समय छैन । कृपया भन्नुस् न तपाईं जानुहुनेछ ।
जारी युद्धमा आफूले कसैको पनि पक्ष नलिएको पनि म्याडोनाले उल्लेख गरेकी छन् । ‘म औंला उठाइरहेको छैन, दोषारोपण गरिरहेको छैन वा कसैको पक्ष लिइरहेको छैन । बन्धक बनाइएकाहरूका आमाहरूसहित सबैजना पीडामा छन्,’ उनले भनेकी छन्, ‘म प्रार्थना गर्छु कि उनीहरूलाई पनि रिहा गरियोस् । म यी बालबालिकाहरूलाई भोकमरीले मर्नबाट जोगाउन सक्दो प्रयास गरिरहेको छु ।’
पोपले हालै मात्र गाजामा तत्काल युद्धविरामका लागि आग्रह गर्दै अन्तर्राष्ट्रिय समुदायलाई मानवीय कानुन र नागरिकहरूको सुरक्षा गर्ने दायित्वको सम्मान गर्न आग्रह गरेका छन् । ‘म फेरि एक पटक यो बर्बर युद्धको अन्त्य गर्दै द्वन्द्वको शान्तिपूर्ण समाधान खोज्न आग्रह गर्दछु,’ पोपले भनेका थिए ।
सहायताकर्मी र डाक्टरहरूका अनुसार गाजामा इजरायलले महिनौंदेखि लगाएको नाकाबन्दी र अस्तव्यस्त आपूर्ति वितरणका कारण गाजामा पहिले कुनै स्वास्थ्य समस्या नभएका बालबालिका समेत कुपोषणबाट मर्न थालेका छन् ।
७ अक्टोबर, २०२३ मा प्यालेस्टिनी लडाकु समूहमाथि आक्रमण गरेको थियो । त्यसयता इजरायलले गाजा क्षेत्रमा लगातार आक्रमण गर्दै आएका छन् । इजरायली हमलाका कारण २० लाखभन्दा बढी प्यालेस्टिनी विस्थापित भइसकेका छन् । र, गाजामै रहेकाहरूले चरम खाद्य संकट व्यहोर्नुपरेको छ । संयुक्त राष्ट्रसंघले गत मे महिनामा गाजामा ५ हजारभन्दा बढी बालबालिका कुपोषणको सिकार भएको जनाएको थियो । तर, इजरायलले भने खाद्य संकट र कुपोषणलाई अस्वीकार गर्दै आएको छ । गाजामा पर्याप्त खाद्यवस्तुको आपूर्ति भइरहेको र हमासले राहत सामग्री चोरेर र राहत वितरण नियन्त्रण गर्ने प्रयास गरेका कारण अभाव सिर्जना भएको इजरायलको दाबी छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
