काठमाडौं– नेपाल सरकारले जारी गरेको पर्वतीय नियम उल्लंघनका कारण मनास्लु र सगरमाथाको सफल आरोहण प्रमाणपत्र लिइसकेका तीन जना विदेश आरोहीको प्रमाणपत्र रद्द गर्दै उनीहरुको नाम आधिकारिक सूचीबाट हटाइएको पर्यटन विभागले जनाएको छ ।
विभागका अनुसार पर्यटन मन्त्रालयका सचिवस्तरीय निर्णयअनुसार, चिनियाँ नागरिक गाओ ली र भारतीय नागरिक नरिन्द्र सिंह र सीमा रानीले विभागबाट लिएको प्रमाणपत्र रद्द गरिएको हो ।
सन् २०१६ सेप्टेम्बर ३० मा ८ हजार १ सय ६३ मिटर उचाइको मनास्लु हिमाल सफलतापूर्वक आरोहण गरेको भन्दै विभागले चिनियाँ नागरिक गाओ लीलाई आरोहण प्रमाणपत्र प्रदान गरेको थियो ।
त्यस्तै, भारतीय नागरिक नरिन्द्र सिंह र सीमा रानीलाई सन् २०१८ मे २० मा सगरमाथामा सफलतापूर्वक आरोहण गरेको भन्दै विभागबाट प्रमाणपत्र लिएका थिए । यी तीनै विदेशीलाई प्रदान गरिएको प्रमाणपत्र विभागले सचिवको निर्णयमा रद्द गरेको हो ।
विभागका अनुसार, हालसम्म ४ सय ६१ वटा शिखरहरू आधिकारिक रूपमा पर्वतारोहणका लागि खुलाइएका छन् । तर खुला गरिएकामध्ये हालसम्म १ सय २ वटा हिमचुचुरोमा अझै आरोहण हुन सकेको छैन । ५८ सय मिटरभन्दा कम उचाइ भएका १५ वटा शिखरलाई पदयात्रा शिखरको रूपमा वर्गिकृत गरिएको छ ।
आरोहणका लागि खुला गरिएका ४ सय ६१ वटा हिमालमध्ये ५८ सयदेखि ६५ सय मिटर उचाइ भएका २६ वटा हिमाल निजी क्षेत्रका व्यवसायीहरुको संगठन नेपाल पर्वतारोहण संघले आरोहण सञ्चालन गर्दै आएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
