राष्ट्रिय सोनाम ल्होछार महोत्सव मङ्गलबारदेखि

समाज

नेपाल लाइभ सोमबार, माघ १४, २०८१ १८:२८

काठमाडौँ– सोनाम ल्होछार पर्वका अवसरमा मङ्गलबारदेखि तीन दिने सांस्कृतिक महोत्सव हुने भएको छ।

नेपाल तामाङ घेदुङका अध्यक्ष एवम् राष्ट्रिय सोनाम ल्होछार समारोह मूल आयोजक समितिका संयोजक मोहन गोलेले आज पत्रकार सम्मेलनमार्फत उक्त महोत्सवबारे जानकारी दिएका हुन्।

सोनाम ल्होछार मन्जुश्री सम्वत् २८६१ डुल-सापुख्री (सर्प वर्ष) पर्वका अवसरमा टुँडिखेलमा महोत्सव आयोजना गरिएको आयोजकले जनाएको छ। उक्त महोत्सव सम्पन्न गर्न एक सय ५१ सदस्यीय मूल आयोजक समिति गठन गरिएको छ। यस वर्ष ‘मन्जुश्री सम्वत् २८६१ सोनाम ल्होछार भव्यरूपमा मनाऔँ, तामाङ भाषालाई सरकारी कामकाजी भाषा कार्यान्वयनमा अघि बढौँ’ भन्ने मूल नारासहित महोत्सव मनाइँदैछ।

अध्यक्ष गोलेले भन्नुभयो, “सोनाम ल्होछार-२८६१ डुल ल्हो (सर्प वर्ष) भएकाले हाम्रो कार्यक्रमस्थलको मुख्य स्टेजलाई पूरै सर्पको मुखाकृति आकारमा बनाइने भएको छ।” महोत्सवमा परम्परागत सामग्रीसहितको स्टल रहनेछ भने स्वास्थ्य शिविर र तामाङ तथा आदिवासी जनजातिसम्बन्धी पुस्तक राखिने आयोजकले जनाएको छ। यो पर्व तामाङ, ह्योल्मोलगायत आदिवासी जनजाति समुदायले मनाउँदै आएका छन्। ल्होको अर्थ साल, सम्वत्, वर्ष, उमेर र छारको अर्थ नयाँ अर्थात् ल्होछारको अर्थ नयाँ वर्ष हो। रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

निजी मेडिकल कलेजका आवासीय चिकित्सकले निर्वाह भत्ता पाउने

फास्ट ट्रयाकमा अध्यादेश पारित गर्ने सरकारको निर्णय, संसद छल्ने नियत नभएको प्रष्टीकरण

‘लोकतान्त्रिक सांस्कृतिक अभियान’ लिएर देश दौडाहा गर्दै लोकगायक विमलराज क्षेत्री