साफ यु–२० च्याम्पियनसिप: माल्दिभ्सलाई हराउँदै भुटान सेमिफाइनलमा

फुटबल

नेपाल लाइभ बुधबार, भदौ ५, २०८१ १७:१२

काठमाडौं– नेपालमा जारी साफ यु–२० च्याम्पियनसिपमा माल्दिभ्सलाई हराउँदै भुटान सेमिफाइनलमा पुगेको छ।

सातदोबाटोस्थित एन्फा कम्प्लेक्समा भएको खेलमा भुटानले माल्दिभ्सलाई २–१ ले पराजित गर्द‌ै भुटान अन्तिम चारमा पुगेको हो। योसँगै समूह ‘बी’को पहिलो खेलमा भुटानलाई १–० ले पराजित गर्दै ३ अंक जोडेको भारतको भने माल्दिभ्ससँगको नतिजा कुर्नुपर्ने भएको छ।

यो समूहमा भुटान र भारतको समान ३ अंक रहेको छ। माल्दिभ्स भने अंकविहीन रहेको छ। भारतलाई सेमिफाइनल पुग्न बराबरीको नतिजा नै पर्याप्त हुनेछ। यही खेलबाट समूह विजेताको टुङ्गो लाग्नेछ।

२२औं मिनेटमा भुटानले अग्रता बनायो। जिग्नम दोर्जीले दिएको कट पासमा माल्दिभ्सका गोलरक्षक मोहम्मद यमिनले सही जजमेन्ट गर्न नसक्दा जित्सुन दोर्जीले खाली पोस्टमा गोल गरे।

५१औं मिनेटमा भुटान १० खेलाडीमा समेटियो। कप्तान राशिद शानानले वान भर्सेस वानको मुभ बनाउँदा डीबक्सभन्दा बाहिर आएर बल बचाउने क्रममा गोलरक्षक सोनम तेन्जिङले हातले बल छुन पुगेपछि रातो कार्ड पाए।

त्यसको फाइदा उठाउँदै माल्दिभ्स खेलमा फर्कियो। प्राप्त फिकिकलाई फिराकले सिधै प्रहार गर्दा भुटानका दोस्रो रोजाइका गोलरक्षक लोछो निमाले रोक्न सकेनन्। उनी स्याङ्गेको स्थानमा मैदान छिरेका थिए।

निर्धारित ९० मिनेटको खेल सकिन केही सेकेन्ड बाँकी रहँदा भुटानले पुन: अग्रता लियो। जिग्मेले अगाडि फ्याँकेको बल माल्दिभ्सको डिफेन्डरलाई डिफ्लेक्ट हुँदै जित्सुनसममम पुगेको थियो। उनले माल्दिभ्सका दुई डिफेन्डरलाई बिट गर्दै दिएको बल अनमार्क रहेका न्गाङ्ग छोपेलले जाली चुमाए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

कर्णाली याक्सलाई महिन्द्रा अग्नि ग्रुपको साथ

विश्नोईको नाममा धम्की दिएको आरोपमा झापाका युवक पक्राउ

हाइटेन्सन तार चुँडिएर करेन्ट लाग्दा मकवानपुरमा एक जनाको मृत्यु