काठमाडौं– प्रतिनिधि सभाका सभामुख डोलप्रसाद अर्यालले भ्रष्टाचार र अनियमितताको अन्त्य गर्दै सुशासन स्थापित गर्नु सरकारको प्रमुख आवश्यकता भएको बताएका छन्।
आइतबार काठमाडौँमा आयोजित एक कार्यक्रममा उनले जनताको अपेक्षा र विश्वासअनुसार सरकारले इमानदारी, प्रतिबद्धता र जबाफदेहीताका साथ काम गर्नुपर्ने बताएका हुन ।
सभामुख अर्यालले २०८२ भदौ २३ र २४ गतेको विद्रोहले नेपाली राजनीतिमा महत्वपूर्ण परिवर्तनको आधार तयार गरेको उल्लेख गर्दै युवा नेतृत्वको अगुवाइमा राष्ट्रिय स्वतन्त्र पार्टी ठूलो जनमतसहित शासन सञ्चालनको जिम्मेवारीमा पुगेको बताए ।
नयाँ राजनीतिक शक्तिका लागि यो ऐतिहासिक अवसरसँगै ठूलो जिम्मेवारी पनि भएको उनको भनाइ छ । उनले राज्यसँग साधन र स्रोत सीमित भए पनि उपलब्ध स्रोतको पारदर्शी र प्रभावकारी परिचालन गर्न सके विकास तथा समृद्धिको यात्रालाई गति दिन सकिने बताए । सभामुख अर्यालले साहित्यकारहरूले समाजका विकृति र विसंगतिमाथि प्रश्न उठाउनुका साथै सकारात्मक प्रयास र असल अभ्यासलाई पनि प्रोत्साहन गर्नुपर्ने बताए । व्यवस्थापिकाको नेतृत्वकर्ताका रूपमा जनताको आवश्यकता र भावनालाई सम्बोधन गर्ने कानून निर्माण प्रक्रियालाई प्रभावकारी बनाउनु आफ्नो प्रमुख दायित्व रहेको उनले बताए । नीति निर्माता तथा जनप्रतिनिधिहरूले समाजका वास्तविक समस्या र नागरिकका पीडा बुझ्न साहित्यको अध्ययन गर्नुपर्नेमा पनि उनले जोड दिए।
उनले भने, ‘व्यवसाय हुँदै राजनीतिमा प्रवेश गरेको मैले देश र जनताको सेवाका लागि सार्वजनिक जिम्मेवारी सम्हाल्ने अवसर पाएको छु । २०८२ भदौ २३ र २४ गतेको घटनापछि नेपाली राजनीतिमा आएको परिवर्तनले नयाँ राजनीतिक शक्तिलाई ठूलो जिम्मेवारी दिएको छ । जनताको अपेक्षा र विश्वासअनुसार इमानदारी, पारदर्शिता र जबाफदेहीताका साथ काम गर्नु आजको आवश्यकता हो । सुशासन कायम गर्न, भ्रष्टाचार अन्त्य गर्न र जनताको भावना सम्बोधन गर्ने कानून निर्माण गर्न सबैको सहकार्य आवश्यक छ । साहित्यले समाजका समस्या, विकृति र नागरिकका भावनालाई जीवन्त रूपमा प्रस्तुत गर्ने भएकाले साहित्य र साहित्यकारप्रति मेरो उच्च सम्मान छ । उत्कृष्ट २५ मा पर्न सफल सम्पूर्ण कथाकारहरूलाई हार्दिक बधाई तथा विजेताहरूलाई विशेष शुभकामना व्यक्त गर्दछु । नेपाली साहित्यको विकास र समाजको सकारात्मक रूपान्तरणमा यहाँहरूको सिर्जनशील योगदान निरन्तर रहिरहोस् ।’
उनले प्रतियोगिताका उत्कृष्ट २५ कथाकारसहित प्रथम, द्वितीय र तृतीय हुने स्रष्टाहरूलाई बधाई दिँदै नेपाली कथा साहित्यको विकासमा निरन्तर योगदान पुर्याउन शुभकामना व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।