काठमाडौं– साउनको दोस्रो साता (साउन १३ गते) सम्म देशैभर ९२.४ प्रतिशत धान रोपाइँ सकिएको छ। गत वर्षको यसै अवधिमा ७८.१ प्रतिशत रोपाइँ सकिएको थियो। गत वर्षको तुलनामा १४.३ प्रतिशतले रोपाइँ बढी भएको कृषि तथा पशुपक्षी विकास मन्त्रालयले जनाएको छ।
चालू १३ लाख ९८ हजार २७३.७३ हेक्टर जमिनमा रोपाइँ हुने अनुमान गरिएको छ। जसमध्ये साउन १३ गतेसम्म १२ लाख ९२ हजार २२१.५७ हेक्टरमा रोपाइँ सकिएको छ।
यस वर्ष समयमा मनसुन सुरु भई नियमित पानी परेका र रासायनिक मलको पर्याप्तताका कारण छिटो रोपाइँ सकिएको कृषि मन्त्रालयका प्रवक्ता डा हरिबहादुर केसीले बताउँछन्। यस्तै यो वर्ष अघिल्लो वर्षको तुलनामा धान रोपाइँ क्षेत्र पनि बढ्ने सम्भावना धेरै रहेको उनको भनाइ छ।
‘अघिल्लो वर्ष समयमा पानी नपरेको कारण रोपाइँ ढिला सुरु भएको थियो। त्यसकारण अनुमानित रोपाइँ क्षेत्रमा धान रोपाइँ हुन सकेन। गत वर्षको तुलनामा यो वर्ष धान रोपाइँ क्षेत्र घट्दैन,बढ्छ। किनकी पोहोर पानी समयमा नपर्दा धेरै स्थानमा धान रोपाइँ हुन सकेन। यो वर्ष अझै एक साता रोपाइँ हुन्छ,’ उनले भने।
सुदूरपश्चिममा ९९.६ प्रतिशत
सो अवधिमा सबैभन्दा धेरै सुदूरपश्चिम प्रदेशमा रोपाइँ सकिएको छ। सुदूरपश्चिममा ९९.६ प्रतिशत रोपाइँ सकिएको मन्त्रालयले जनाएको छ। गत वर्ष यसै अवधिमा सुदूरपश्चिममा ९९.२ प्रतिशत मात्रै रोपाइँ भएको मन्त्रालयको तथ्यांकमा उल्लेख छ। सुदूरपश्चिम प्रदेशमा १ लाख ७५ हजार ५७६ हेक्टर क्षेत्रमध्ये १ लाख ७३ हजार ७९९ हेक्टरमा रोपाइँ सकिएको हो।
यस्तै दोस्रो कर्णाली प्रदेशमा ९६.९ प्रतिशत रोपाइँ सकिएको छ। गत वर्षको यसै अवधिमा कर्णालीमा ८५ प्रतिशत मात्रै रोपाइँ भएको थियो। गत वर्षको तुलनामा कर्णालीमा ६.९ प्रतिशत बढि क्षेत्रमा रोपाइँ सकिएको छ।
कर्णालीमा ४१ हजार ९०४ क्षेत्रमा रोपाइँ हुने सरकारको अनुमान रहेको छ। जसमध्ये ४० हजार ६२३.२ हेक्टरमा रोपाइँ सकिइसकेको मन्त्रालयको तथ्यांकमा उल्लेख छ।
३३.२ प्रतिशत बढी रोपाइँ सकियो मधेसमा
यस्तै मधेस प्रदेशमा ९२ प्रतिशत रोपाइँ सकिएको छ। गत वर्षको सोहि अवधिमा मधेस प्रदेशमा ५८.८ प्रतिशत मात्रै रोपाइँ सकिएको थियो। जसअनुसर मधेस प्रदेशमा गत वर्षको तुलनामा यस वर्ष ३३.२ प्रतिशत बढि रोपाइँ सकिएको छ।
गत वर्ष मधेस प्रदेशमा समयमा पानी नपर्दा रोपाइँ हुन नसकेको प्रवक्ता डा केसी बताउँछन्। ‘मधेसमा पनि त पानी नपर्दा रोपाइँ गर्न सजिलो छैन। सबै ठाउँमा सिँचाइको सुविधा पुगेको छैन। पोहोर सुरुमा पर्याप्त पानि भएन। र अनुमानित रोपाइँ हुन सकेन,’ उनले भने।
मधेसमा ३ लाख ८३ हजार १५० हेक्टर क्षेत्रमा रोपाइँ हुने अनुमान छ। जसमध्ये ३ लाख ५२ हजार ४४३ हेक्टरमा धान रोपाइँ सकिएको तथ्यांकमा उल्लेख छ।
गण्डकी प्रदेशमा ९१.९ प्रतिशत रोपाइँ सकिएको छ। गत वर्ष यसै अवधिमा ८२.३ प्रतिशतमात्रै रोपाइँ भएको थियो। गण्डकीमा ९६ हजार ५३ हेक्टर क्षेत्रमा रोपाइँ हुने अनुमान छ। जसमध्ये ८८ हजार २५२.६ हेक्टरमा रोपाइँ भइसकेको मन्त्रालयले जनाएको छ।
लुम्बिनी प्रदेशमा ९१.३ प्रतिशत रोपाइँ सकिएको छ। गत वर्ष यसै अवधिमा लुम्बिनीमा ८०.९ प्रतिशत रोपाइँ सकिएको थियो। लुम्बिनी प्रदेशमा ३ लाख ११ हजार ६४३ हेक्टर क्षेत्रफलमा धान रोपाइँ हुने सरकारको अनुमान छ। जसमध्ये २ लाख ८४ हजार ४८५ हेक्टर क्षेत्रमा धान रोपाइँ सकिएको छ।
बागमती प्रदेशमा ९०.८ प्रतिशत रोपाइँ सकिएको छ। गत वर्ष बागमतिमा ८०.१ प्रतिशत रोपाइँ भएको थियो। यो वर्ष बागमति प्रदेशमा १ लाख १२ हजार २७३ हेक्टर क्षेत्रमा धान रोपाइँ हुने अनुमान गरेको छ। जसमध्ये १ लाख १ हजार ९९४ हेक्टरमा रोपाइँ सकिएको मन्त्रालयले जनाएको छ।
यस्तै कोशी पदेशमा ९०.७ प्रतिशत रोपाइँ सकिएको छ। गत वर्षको यसै अवधिमा कोशीमा ८३.६ प्रतिशतमा रोपाइँ सकिएको थियो। गत वर्षको तुलनामा ७.१ प्रतिशतले बढि रोपाइँ सकिएको छ।
कोशीमा २ लाख ७६ हजार ३८६.७३ हेक्टरमा धान रोपाइँ हुने अनुमान छ। जसमध्ये २ लाख ५० हजार ६२४.७७ हेक्टरमा रोपाइँ सकिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
