काठमाडौं– कोशी प्रदेश सरकारको गौरवको आयोजना घिनाघाट–विराटचोक चार लेन सडकको बाँकी काम अन्तिम चरणमा पुगेको छ।
निर्माण सुरु भएर चार वर्षसम्म म्याद मात्रै थपिरहेको सो सडकको काम अन्तिम चरणमा सम्पन्न पुगेको हो। पटकपटक म्याद थप गर्दा पनि काम अघि बढ्न नसकेको आयोजना पछिल्लो आठ महिनादेखि अलपत्र अवस्थामा रहेको थियो। घिनाघाट–विराटचोक २२.१९ किलोमिटरको सडक आयोजनाको बाँकी काम शुरु हुन लागेसँगै स्थानीयहरु काम सम्पन्न हुने आशमा रहेका छन्।
कोशी प्रदेश सरकारले सार्वजनिक खरिद नियमावलीको १३ औं संशोधनमार्फत एक पटकका लागि म्याद थप गर्नसक्ने व्यवस्था गरेपछि घिनाघाट–विराटचोक सडकखण्डको बाँकी काम चाँडै सम्पन्न हुने निश्चित भएको हो। यस अघिको सार्वजनिक खरिद नियमावलीमा म्याद सकिनुभन्दा २१ दिनअघि नै म्याद थपको निवेदन दिनुपर्ने व्यवस्था गरिएको थियो। तर अन्तिम चरणमा रहेका आयोजनाहरू सम्पन्न गराउन सरकारले नियमावलीको उक्त मौजुदा व्यवस्था संशोधन गरेपछि अलपत्र अवस्थामा रहेको घिनाघाट–विराटचोक चारलेन सडक आयोजना अबको एक वर्षभित्रै सम्पन्न हुने पूर्वाधार विकास कार्यालय, मोरङका प्रमुख सुशील श्रेष्ठले बताए।
उनले कोभिड १९ का कारण र विभिन्न कारणले भएको मूल्य वृद्धिले पनि केही ढिलाइ भएको बताए। अहिले १३ औं संशोधनमार्फत असार मसान्तसम्म म्याद थप गरेर काम पूरा गराउने पक्षमा लागेको बताए।
घिनाघाट–विराटचोक सडक तीन प्याकेजमा विभाजन गरी २०७६ सालदेखि बनाउन शुरु गरिएको थियो। सडकको विराट चोकदेखि नेता चोकसम्मको पहिलो प्याकेज र नेता चोकदेखि मिलन चोकसम्मको दोस्रो प्याकेज निर्माणको ठेक्का श्रेष्ठ–रमन–एपेक्स जेभीले पाएको थियो। २०७६ असार २९ गतेको सम्झौता बमोजिम दुवै प्याकेजको निर्माण कार्य २०७८ असार २८ गतेभित्र सम्पन्न भइसक्नुपर्ने थियो।
तर हालसम्म दोस्रो प्याजकेजअन्तर्गतको नेता चोकदेखि मिलन चोकसम्मको १० किलोमिटर सडक निर्माणको काम सकिए पनि पहिलो प्याकेजको भौतिक प्रगति पनि ८८ प्रतिशतभन्दा उँभो बढ्न सकेको छैन। तथापि आगामी वर्षको असार मसान्तभित्रै बाँकी निर्माण कार्य सम्पन्न भइसक्ने ठेकेदार कम्पनीका प्रोजेक्ट म्यानेजर सौरभ दाहालले बताए। कोरोना लगायतका कारणले पनि समस्या आएको बताए। आफूहरुको पनि कमजोरी रहेको बताउँदै असारसम्ममा काम पूरा हुने बताए।
घिनाघाट–विराटचोक सडकअन्तर्गत मिलनचोकदेखि पुष्पलाल चोकसम्मको तेस्रो प्याकेजअन्तर्गत सिंघिया खोलाको पुलको काम भइरहेको छ। कोशी प्रदेश सरकारको भौतिक पूर्वाधार विकास मन्त्रालयका सडक महाशाखा प्रमुख रमेश श्रेष्ठले निर्माणको ठेक्का पाएको लामा–बानियाँ जेभीले पहिलोपटकको थप म्यादमा काम सम्पन्न गर्न नसकेपछि अहिले दोस्रोपटक म्याद थपको तयारी भइरहेको बताए।
दोस्रोपटक थपिएको म्यादमा पनि ठेक्का सम्पन्न नगरे उक्त निर्माण कम्पनीलाई कालोसूचीमा समावेश गर्ने चेतावनी दिए।
तत्कालीन मुख्यमन्त्री शेरधन राईले २०७६ भदौ २३ गते शिलान्यास गरेको विराटचोक–घिनाघाट सडकलाई विराटनगर प्रवेश गर्ने कोशी राजमार्गको विकल्पका रूपमा हेरिएको छ। तर कछुवा गतिमा भएको सडक निर्माणको कामले अझै पनि पूर्णता नपाउँदा यो बाटो प्रयोग गर्नेहरूले सास्ती भोग्नु परिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
