चितवन– भरतपुर महानगरपालिका–१७ मा सिँचाइका लागि दुई डिप बोरिङ र १८ वटा स्यालो ट्युबेल निर्माण गरिएको छ। एक सय ७० बिघा क्षेत्रफल सिँचाइ गर्नका लागि निर्माण गरिएका डिप बोरिङ र स्यालाट्युबेलको आज उद्घाटन गरिएको हो।
महानगरप्रमुख रेनु दाहालले एक कार्यक्रमकाबीच ती सिँचाइ आयोजनाको उद्घाटन गरेकी हुन्। १८ वटा स्यालो ट्युबेल निर्माणका लागि चितवन भूमिगत संयोजनात्मक जल सिँचाइ आयोजनाले रु एक करोड ३५ लाख र दुईवटा डिप बोरिङ निर्माणका लागि रु एक करोड ५८ लाख खर्च गरेको छ।
सिँचाइका लागि डिप बोरिङ र स्यालो ट्युबेल उद्घाटन भएसँगै स्थानीय उत्साहित भएका छन्। कार्यक्रमलाई सम्बोधन गर्दै महानगर प्रमुख दाहालले महानगरभित्र सिँचाइको अभावले बाली लगाउन सकिएन भन्ने अवस्था हट्दै गएको बताइन्।
भरतपुरमा सञ्चालित भूमिगत र सतह सिँचाइले कृषकको मुहारमा खुसी ल्याएको उनको भनाइ थियो। महानगर प्रमुख दाहालले भनिन्, ‘पहिलाको सुख्खाग्रस्त ठाँउ हाराभरा भएका छन्। एक बाली हुने ठाउँमा चार किसिमका बाली हुन थालेका छन्।’
भरतपुरमा भूमिगत सिँचाइ, नारायणी लिफ्ट सिँचाइ र केरुङ्गा घोल सिँचाइ परियोजना एक साथ सञ्चालनमा आउँदा यहाँका जमिनमा बाह्रैमहिना सिँचाइ पुगेको उहाँले बताइन्।
महानगर क्षेत्रभित्र सिँचाइ आयोजनाबाट ५० वटा डिप ट्युबेल, तीन सय ३० स्यालो ट्युबेल र महानगरले सात सय बढी स्यालो ट्युबेल निर्माण गरिरहेका प्रमुख दाहालले जानकारी दिइन्।
कार्यक्रममा भूमिगत सिँचाइ आयोजनाका प्रमुख देवकुमार स्याङ्बोले भूमिगत सिँचाइका कारण भरतपुरको उत्पादनमा वृद्धि भई कृषकले मनग्य आम्दानी गर्न सफल भएका बताए। भरतपुरमा प्राकृतिक रुपमा मात्र सिँचाइ गरी बाली लगाउने अवस्थाको अन्त्य भएको उनको भनाइ थियो।
भरतपुरमा भएका ट्युबेलले कूल छ हजार एक सय २० बिघा क्षेत्रफलमा सिँचाइ हुने आयोजनाका प्रमुख स्याङ्बोले जानकारी दिए। उनका अनुसार यहाँका कृषकले नारायणी लिफ्ट र केरुङ्गा जल सिँचाइ आयोजनामार्फत सिँचाइ सुविधा लिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
