काठमाडौं– आजदेखि संघीय संसदको दुवै सदनको हिउँदे अधिवेशन सुरु हुँदैछ। अपरान्ह ४ बजे संसदको दुवै सदन प्रतिनिधि सभा र राष्ट्रिय सभाको बैठक बस्दैछ। विधेयक अधिवेशनको रुपमा लिइने हिउँदे अधिवेशनमा आफ्नो भूमिकालाई प्रभावकारी बनाउनका लागि सांसदहरुले आ–आफ्नो तयारी गरिरहेका छन्।
नेकपा (माओवादी केन्द्र) का प्रमुख सचेतक हितराज पाण्डेले आफ्नो भूमिका दलहरुसँग समन्वयकारी हुने बताए। उनले आफू सत्तारुढ दलभित्रको एउटा घटकको प्रमुख सचेतक भएको भन्दै गठबन्धनका दलहरुसँग आवश्यक समन्वय गर्नुपर्ने जिम्मेवारी रहेको बताए।
आफ्ना सांसदहरुलाई उत्प्रेरित गर्ने, दलभित्रका विषयवस्तुलाई व्यवस्थित गर्ने र संसदमा दलको भुमिकालाई प्रभावकारी बनाउन भूमिका खेल्ने उनको भनाइ छ।
त्यस्तै, नेकपा(एमाले)का सचेतक महेश बर्तौलाले जनताको समस्याहरुलाई संसदबाट उठाउने बताए। विकास निर्माण, सुशासन र सामाजिक न्यायको पथमा राज्यलाई घच्घच्याउने उनको भनाइ छ।
उनले सरकारसँग जनताको अपेक्षा र भरोसा हुने भन्दै जनताको अपेक्षाहरुलाई पूरा गर्नका लागि पनि आफूले भूमिका खेल्ने उल्लेख गरे। उनले संसदमा हुने रचनात्मक र बौद्धिक विमर्शमा पनि आफ्नो भूमिका हुने बताए।
नेपाली कांग्रेसकी सचेतक सुशिला थिङले सरकारले संसदमा ल्याएका विधेयकहरुलाई छिटोभन्दा छिटो पारित गराउन र विधेयकमा जनताको कुराहरु सम्बोधन गर्न लाग्ने बताइन्। उनले संसदलाई प्रभावकारी बनाउन पनि कुनै कञ्जुस्याँइ नगरी लाग्ने दाबी गरिन्।
नेपाली कांग्रेसका सांसद जीवन परियारले आफू संवद्ध समितिको कामलाई तदारुकता दिने बताए। आफूले प्रतिनिधित्व गरेको समूहको पक्षमा आवश्यक कानूनहरु निर्माण गर्न विशेष पहलकदमी लिने पनि बताए। जनताका ज्वलन्त समस्याहरुलाई पनि संसदमा उठाउने आफ्नो तयारी रहेको उनको भनाइ छ।
नेकपा(एमाले)की सांसद अमृतादेवी अग्रहरीले देशमा अराजकता र भ्रष्टाचार बढिरहेको भन्दै यसको अन्त्यका लागि जोडदार आवाज उठाउने बताइन्। उनले पार्टीको निर्णय र निर्देशनअनुसार पनि आफ्नो प्रस्तुति हुने उल्लेख गरिन्।
एमालेकै सांसद तारा लामा तामाङले सरकारले बजेट कार्यान्वयनमा तदारुकता नदेखाएको भन्दै यस सन्दर्भमा आवाज उठाउने बताइन्। उनले संसदमार्फत राष्ट्र र राष्ट्रियताको लागि आवाज उठाउने पनि उल्लेख गरिन्।
सांसद मनबहादुर गुरुङले विकास निर्माणमा भएको ढिलासुस्ती र राष्ट्रियताका कुराहरुलाई विशेष तरिकाले उठाउने सोचमा रहेको बताए।
सांसद शान्ती श्रेष्ठले सरकारको कामको लेखाजोखा गर्ने र सोहीअनुरुप संसदमा प्रस्तुत हुने बताइन्। उनले संक्रमणकालीन न्यायसँग सम्बन्धित विधेयक, शिक्षा सम्बन्धी विधेयक लगायतका विधेयकहरुलाई छिट्टै पारित गर्नुपर्ने अवस्था रहेको भन्दै सोही अनुरुप भूमिका खेल्ने बताइन्।
सांसद चन्द्रबहादुर विश्वकर्माले समाजमा विभिन्न प्रकारका बेथिति र अपारदर्शिताहरु रहेका भन्दै त्यसकोविरुद्ध आवाज उठाउने बताए। कानुनको अभावमा जनताले दुःख पाउने स्थिति रहेकाले जनतामा सहजीकरण गर्न र कानून निर्माणमा सहजता ल्याउन आफ्नो तर्फबाट भूमिका खेल्ने उनको भनाइ छ।
सांसद विश्वकर्माले विगतमा जस्तो सरकारले संसदमा विजनेस नदिने कुराको अन्त्य होस् भन्ने आफूले चाहेको पनि बताए। जनताका समस्याहरु समाधानका लागि आफूले पहलकदमी लिने उनको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
