काठमाडौं- नेकपा एकीकृत समाजवादीका अध्यक्ष माधवकुमार नेपालले कांग्रेस सभापति शेरबहादुर देउवाको लोभका कारण २०७९ पुस १० गते कांग्रेस नेतृत्वको गठबन्धन टुटेको बताएका छन्। त्यतिबेला देउवा एमाले अध्यक्ष केपी शर्मा ओलीको सहयोगमा आफू नै प्रधानमन्त्री बन्ने लोभमा परेकाले सो गठबन्धन टुटेको नेपाललको भनाइ छ।
पार्टीको विद्यार्थी विशेष कमिटीको कार्यक्रममा सम्बोधन गर्दै बुधबार नेपालले कांग्रेसका शेरबहादुर देउवा प्रधानमन्त्री भइसकेको हुनाले चुनावपछि प्रचण्डलाई प्रधानमन्त्री बनाउने सहमतिसमेत भइसकेको बताए। तर ओलीले देउवालाई फोन गरेर प्रचण्डलाई प्रधानमन्त्री नबनाउन बरु आफैं बन्न सुझाएका थिए भन्ने नेपालको भनाइ छ।
ओलीले पूरा साथ दिन्छौं भनेकैले देउवामा लोभ जागेको नेपालले बताए। भने, ‘देउवाले प्रचण्डलाई 'तपाईंलाई प्रधानमन्त्री बनाउन सक्दिनँ’ भन्नुभयो।’
२०७८ को सुरुवातमै कांग्रेसको नेतृत्वमा गठन भएको गठबन्धन २०७९ पुस १० गते देउवा र प्रचण्डमध्ये को प्रधानमन्त्री बन्ने भन्ने टकरावले टुटेको थियो।
अर्कोतिर ओलीले प्रचण्डलाई पनि खबर पठाएर देउवाले प्रधानमन्त्री नबनाउने बरु आफूले बनाउने भएकाले आफूकहाँ आउन भनेको नेपालले बताए। त्यतिञ्जेल देउवा ओलीलाई कुरेर बसिरहेको र अन्तिम समयमा आफूलाई फोन गरेर प्रचण्डलाई फिर्ता ल्याउन भनेको उनले बताए।
‘शेरबहादुरले मलाई फोन गरे। प्रचण्डलाई बोलाऔं र प्रधानमन्त्री बनाऔं भनेर। मैले मौका गुमिसकेको र केपी ओलीले बोकेर लगिसकेको र प्रधानमन्त्री बनाउने भइसकेको भनेपछि बर्बाद भयो भने’, नेपालले सम्झिए।
त्यस दिन देउवाबाट छुटेपछि प्रचण्ड ओली निवास बालकोट पुगेका थिए। केही घण्टामै एमाले नेतृत्वमा नयाँ गठबन्धन बनेको थियो। र त्यसै दिन नयाँ गठबन्धनको तर्फबाट प्रचण्ड प्रधानमन्त्री नियुक्त भएका थिए।
एमाले नेतृत्वमा गठबन्धन बनेपछि र प्रचण्ड प्रधानमन्त्री बनेपछि ओलीले प्रचण्डमाथि हैकम चलाउन थालेको नेपालको भनाइ छ। ‘मैले तपाईंलाई प्रधानमन्त्री बनाएको हो, मैले जे भन्छु, त्यही गर्नुपर्छ भनेर प्रचण्डलाई पूरै अपमान गर्न थाले’, नेपालले भने।
प्रचण्डले आफूलाई अर्थमन्त्री, गृहमन्त्री चाहिन्छ भन्दा ओलीले नै हुँदैन भनेको नेपालको भनाइ छ। ‘तपाईंले फलानालाई गृहमन्त्री बनाउनुस्। फलानालाई उपप्रधानमन्त्री बनाउनुस्। सारा आदेश केपी ओलीले दिन थालेपछि प्रचण्डलाई अपमानको फिलिङ भयो’, उनले भने।
ओलीको अपमानले नै प्रचण्ड सो गठबन्धन टुटाउन लागेको नेपालको भनाइ थियो। सम्झिए, ‘प्रचण्डले हामीलाई भने- तपाईंहरूले सहयोग गर्नुस्। केपी ओलीसँग मिलेर जान सकिँदैन। त्यसपछि हामीले समर्थन गरेर अनि स्थिति उल्टियो।’
पुसमा गठन भएको एमाले नेतृत्वको गठबन्धन फागुनमा भत्किएर कांग्रेस नेतृत्वको पुरानै गठबन्धन ब्युँतिएको थियो। सोही अनुसार एमाले, राप्रपा जस्ता दलहरू सरकारबाट बाहिरिएका थिए। पछि कांग्रेस र एकीकृत समाजवादी जस्ता दलहरू भित्रिएका थिए। नयाँ गठबन्धन बनेपछि कांग्रेसका नेता रामचन्द्र पौडेल र जसपाका नेता रामसहायप्रसाद यादव उपराष्ट्रपति निर्वाचित भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
