सुदूरपश्चिम प्रदेश सभा: विषयगत समितिको निर्वाचन प्रक्रिया २४ गतेबाट, २५ गते मतदान

राजनीति

नेपाल लाइभ आइतबार, पुस २२, २०८० १४:२६

धनगढी– सुदूरपश्चिम प्रदेश सभाअन्तर्गत गठित ४ वटा विषयगत समितिको निर्वाचन कार्यतालिका सार्वजनिक गरिएको छ।

प्रदेश सभा सचिवालयका अनुसार ४ वटा विषयगत समितिलाई पूर्णता दिलाउन सभामुख भीमबहादुर भण्डारीले आइतबार प्रदेश सभा सदस्यहरुसँग छलफल गरेपछि निर्वाचन कार्यतालिका सार्वजनिक गरेका हुन्। निर्वाचन कार्यतालिका प्रदेश सभाको सूचना पाटीमा टाँस गरी सार्वजनिक गरिएको सभामुख भण्डारीले जानकारी दिए।

प्रदेश सभा सचिवालयले सार्वजनिक गरेको कार्यतालिका अनुसार २४ गतेदेखि निर्वाचन प्रक्रिया सुरु गरिनेछ। मतदाताको नामावली प्रकाशन, सभापतिका उम्मेदवारको उम्मेदवारी दर्ता, उम्मेदवारी फिर्ता लगायतका काम पूरा गरिनेछ। यस्तै, पुस २५ गते बुधबार दिउँसो १ बजे सभापतिको चुनाव गरिनेछ।

प्रदेशको विषयगत समिति गठन भएको १ वर्ष बढी भइसकेको छ। समितिले सभापति पाउन नसक्दा ज्येष्ठ सदस्यको अध्यक्षतामा बैठकहरु बस्ने गरेका छन्। जेठ ६ गते बसेको प्रदेश सभाको दोस्रो कार्यकालको प्रथम अधिवेशनको नवौं बैठकले विषयगत समिति गठन गरेको थियो।

प्रदेशमा विधायन तथा प्रदेश मामिला समिति, सार्वजनिक लेखा समिति, अर्थ विकास तथा प्राकृतिक स्रोत समिति र सामाजिक विकास समिति रहेका छन्।

सुदूरपश्चिम प्रदेश सभामा नेपाली कांग्रेस, नेकपा माओवादी केन्द्र, नेकपा एकीकृत समाजवादी पार्टी, नेकपा एमाले, नागरिक उन्मुक्ति पार्टी, राष्ट्रिय प्रजातन्त्र पार्टी गरी ६ दल र एक स्वतन्त्र प्रदेश सभा सदस्य रहेका छन्।

नेपाली कांग्रेस, नेकपा माओवादी केन्द्र, नेकपा एकीकृत समाजवादी र नागरिक उन्मुक्ति पार्टीको गठबन्धनमा सुदूरपश्चिम प्रदेश सरकार बनेको छ। १ मन्त्री र राज्यमन्त्री पाएको उन्मुक्ति पार्टीले संसदीय समितिमा २ जना सभापति आफ्नो हुनुपर्ने दाबी गरिरहेको छ भने राष्ट्रिय प्रजातन्त्र पार्टी पनि विषयगत समितिको सभापतिको दाउमा रहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

चलचित्र ‘लाज शरणम्’ को गीत ‘हेर्दा हेर्दैमा’ सार्वजनिक

रवि लामिछानेलाई ५४ लाख धरौटीमा छाड्न चितवन जिल्ला अदालतको आदेश

सुनिल पौडेलविरुद्ध घुस लिएको आरोपमा अर्को भ्रष्टाचार मुद्दा