संविधान कार्यान्वयन र देश विकास लागि एमाले–मा‌‌ओवादी सहकार्यको विकल्प छैन : उपमहासचिव पुन

राजनीति

नेपाल लाइभ बुधबार, पुस १८, २०८० १८:५४

काठमाडौं– नेकपा माओपादी केन्द्रका उपमहासचिव वर्षमान पुन अनन्तले संविधान कार्यान्वयन र देश विकासका लागि एमाले–माओवादी सहकार्यको विकल्प नभएको दाबी गरेका छन्।

मार्क्सवादी अध्ययन केन्द्रले बुधबार राजधानीमा गरेको ‘आजको वामपन्थ’ शीर्षकको राष्ट्रिय गोष्ठीलाई सम्बोधन गर्ने क्रममा पुनले तत्कालै वर्तमान सत्ता गठबन्धन र सरकार परिवर्तन नभए पनि शान्ति प्रक्रियाको पूर्णता, गणतन्त्रसहित राजनीतिक परिवर्तनमाथि दक्षिणपन्थी शक्तिबाट हुन थालेका प्रहारको प्रतिवाद तथा संविधान कार्यान्वयनसहित देश विकासका अजेण्डामा एमाले–माओवादी सहकार्यको विकल्प नरहेको औंल्याए।

‘०६२/०६३ को जनआन्दोलन कम्युनिष्टहरुको नेतृत्वमा भएको हो। त्यसको स्वामित्व लिऔं’, पुनले भने, ‘एकअर्काप्रति लक्षित घोचपेच छाडेर शान्ति प्रक्रियाका काममा सहकार्य गरौं।’ पुनले तत्कालीन नेपाल कम्युनिष्ट पार्टी (नेकपा) विभाजनका कारण जनतामा निराशा बढेकोसमेत बताएका छन्।

पुनले नेकपा बचाउन नसक्नुमा शीर्षस्थ नेताहरु दोषी रहेको भन्दै त्यसको जिम्मेवारी लिनुपर्ने उल्लेख गरे। ‘नेकपाको एकता टिकाउन सक्नुपर्थ्यो’, पुनले भने, ‘म पनि त्यतिखेरको सरकारको मन्त्री भएका कारण जिम्मेवारी त लिन्छु, तर मुख्य जिम्मेवारी नेताहरुले नै लिनुपर्छ।’

पुनले कहिले शान्तिपूर्ण र कहिले संघर्ष संघर्षको धाराबाट आएका एमाले र माओवादीबीच प्रमुख कार्यदिशामा मतान्तर नरहेको पनि बताए। उनले झापादेखि एमालेले गरेका संघर्षको स्वामित्व आफूहरुले लिने भन्दै १० वर्षे माओवादी जनयुद्धको स्वामित्व लिन र शान्ति प्रक्रियाका बाँकी काममा सहकार्यको हात बढाउन पुनले एमाले नेतृत्वलाई आग्रह गरे।

गणतन्त्र, संघीयता, धर्मनिरपेक्षता, समावेशीता, समानुपातिक प्रतिनिधत्वका अजेण्डामाथि राजावादी र केही नयाँ भनिने शक्तिले प्रहार केन्द्रित गरेका बेला परिवर्तन ल्याउन भूमिका खेलेका सबै प्रमुख राजनीतिक शक्तिबीच सहकार्य हुनुपर्ने उनको भनाइ थियो। संघ र प्रदेशका संसद तथा स्थानीय सरकार, अदालत र कर्मचारीतन्त्रमा महिला, मधेसी, जनजाति र दलितहरुको समानुपाकित प्रधिनिभित्व भएको मन नपराउनेहरु वर्तमान संविधान र प्रणालीको विरोधमा उत्रिएको पुनले बताए।

‘अहिले सबैभन्दा बढी आर्थिक वृद्धिद्धर कर्णालीमा देखिएको छ। यो साधन श्रोतको तलसम्म वितरण भएका कारणले भएको हो’, उनले भने, ‘स्रोत तल गएपछि माथि बसेर खटनपटन गर्दै आएकाहरुलाई संघीयता मन परेको छैन।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

गायिका मङ्गेशकरको स्वर रहेको ‘बाचुन्जेलीलाई’ सार्वजनिक

राष्ट्रसङ्घीय मानवअधिकार परिषद्बाट इजरायल अलग

‘फेरि रेशम फिलिली’ टिजरमा अमेरिका मोहको कथा