काठमाडौं- काठमाडौंमा अनलाइन न्युजपोर्टल दर्ता गरेर पौने चार करोड रुपैयाँ ठगी गरेको खुलेको छ। अपराधबाट उम्कनका लागि अनलाइन न्युजपोर्टल खोल्ने र त्यसको आवरणमा ठगी धन्दा चलाएर पौने चार करोड रुपैयाँ ठगी गरेको खुलेको हो।
प्रहरीले गरेको दुई महिना लामो अनुसन्धानमा यो ठगी गिरोहमा नेपालदेखि हङकङ र चिनियाँ नागरिकसम्म जोडिएका छन्। यो ठगीको अनुसन्धान भने एक युवतीबाट सुरु भएर अहिले ४५ जनालाई प्रतिवादी बनाउँदै टुंगिएको छ।
भोजपुरको हतुवागढी गाउँपालिका–६ घर भई काठमाडौंको टोखा नगरपालिका–६ बस्ने २८ वर्षीया दादिका शेर्पा (राई)लाई पक्राउ गरेर सुरु गरिएको अनुसन्धानले अहिले ४५ जनालाई प्रतिवादी बनाएको छ।
दादिकालाई पक्राउ गरेर सुरु गरिएको २ महिना लामो अनुसन्धानबाट ४५ जनालाई प्रतिवादी बनाउँदै जिल्ला अदालत काठमाडौंमा मुद्दा दर्ता गरिएको छ। नामथर, ठेगाना खुलेका ४५ जनालाई प्रतिवादी बनाइएको छ भने करिब त्यति नै संख्यामा नाम खुलेका तर पूरा विवरण नखुलेकाहरुलाई पूरा विवरण खुलेका बखत पुनः मुद्दा दर्ता हुने भन्दै मुद्दा चलाइएको छ।
दादिकाबाट सुरु भएको अनुसन्धानले ४५ जनालाई प्रतिवादी बनाउनुका साथै यो गिरोहबाट १८२ जना पीडित भएको खुलेको छ। यो समूहले १८२ जनाबाट ३ करोड ७४ लाख ५४ हजार ९९८ रुपैयाँ ठगी गरेको समेत खुलेको छ।
दादिका पक्राउ परेपछि उनीमार्फत नै प्रहरीले अर्का आरोपी रामेछापको खाडादेवी गाउँपालिका–३ घर भएका २४ वर्षीय जीवनकुमार श्रेष्ठलाई पक्राउ गरेको थियो। अहिले यी दुई जनालाई पक्राउ प्रतिवादी बनाएर अदालतमा पेस गरिएको छ। बाँकी ४३ जनालाई भने फरार प्रतिवादी बनाएर मुद्दा बुझाइएको जिल्ला प्रहरी परिसर काठमाडौंका एसपी तथा प्रवक्ता कुमोध ढुंगेलले जानकारी दिए।
यता विदेशी हङकङ, चिनियाँ नागरिककै मुख्य डिजाइनमा यो ठगी भए पनि उनीहरुले हकमा सबै विवरण पत्ता लगाउन नसक्दा उनीहरु अनुसन्धानको राडर बाहिरै छन्।
पक्राउबाट जोगिन न्युजपोर्टल दर्ता
काठमाडौं उपत्यका अपराध अनुसन्धान कार्यालयले अनलाइन ठगी आरोपमा दादिकालाई गत असोज ४ गते पक्राउ गरेको थियो।
फेसबुक, ह्वाट्स एप, भाइबर जस्ता सामाजिक सञ्जालको माध्यमबाट साथी बनाउने र उनीहरुको जिमेल आईडीमा फिफिए एपको यूआरएल लिंक पठाउने, त्यसपछि उक्त एप इन्टल गर्न लगाउने र अनलाइन जुवा खेलाउँदै रकम ठगी गरेको भन्दै अपराध अनुसन्धान कार्यालयले दादिकालाई पक्राउ गरेको थियो।
पक्राउ गरेपछि दुई महिनासम्म गरिएको अनुसन्धानमा थप नयाँ रहस्य खुलेको छ। ठगीबाट जोगिने वैधानिक देखाउनका लागि फिफिए नामको अनलाइन मिडिया नै दादिकाले खोलेको पाइएको छ।
दादिका फेसबुकमा भने टासी शेर्पाको नामले परिचित थिइन्। टासीको नामको फेसबुक चलाउने क्रममा चेन यान फि नामबाट उनलाई एक दिन फ्रेण्ड रिक्वेस्ट आउँछ। दादिकाले तत्कालै एसेप्ट गर्छिन्।
त्यसपछि चेनले बताउँछन्, ‘म हङकङमा बस्छु। मिलेर अनलाइन बिजनेस गरौं, पैसा कमाऔं र अनाथ बालबालिका र बेवारिसे कुकुरको व्यवस्थापनमा काम गरौं।’
हङकङ नागरिकको त्यो कुरामा तत्कालै विश्वास गरेर दादिकाले स्वीकार गर्छिन्। त्यसपछि सुरु हुन्छ पौने चार करोडको ठगी धन्दा।
चेनले दादिकाले म्यासेन्जरमा फिफिए एपको लिंक पठाउँछन्। चेनले नै भनेअनुसार दादिकाले उक्त एप डाउनलोड गरी आईडी क्रिएट गर्छिन्। उक्त एपबाट सुरु गरिन्छ अनि सुरु हुन्छ–क्रिकेट, फुटबलको सट्टेबाजीदेखि अनलाइन जुवा।
यसरी सिधै अनलाइनमार्फत जुवा खेलाउँदा फस्न सक्ने भन्दै हङकङ नागरिक चेनले दादिकालाई फिफिए मिडिया दर्ता गर्न लगाउँछन्। त्यसपछि दादिकाले फिफिए अनलाइन मिडिया प्रालि दर्ता गर्छिन्।
हङकङका गिरोहले नै तिर्थे बिल
कम्पनी दर्तापछि दादिकाले धापासीमा फ्ल्याट नै भाडामा लिइन्। उक्त फ्ल्याटको मासिक ३० हजारदेखि अन्य सेमिनार गोष्ठी गर्दाको बिल सबै हङकङका गिरोह नै तिरिदिन्थे।
उक्त फ्ल्याटमा फिफिएसँग सम्बन्धित विभिन्न व्यक्तिहरुको फोटो टाँस्ने, सिनियर म्यानेजर भनेर फोटो टाँस्ने, कार्यक्रमका फोटाहरु टास्ने, दर्ताका प्रमाणपत्रहरु समेत भित्तामा टाँस्ने र विश्वास दिलाउने काम दादिकाले गरिन्। र, अफिस भिजिटका लागि आउनेहरुलाई विश्वास दिलाइन्।
टासीको नाममा फिफिएको भिजिटिङ कार्ड समेत दादिाकाले बनाइन्। फिफिए अनलाइन मिडिया प्रालिले समाचार, लेख, रचना प्रकाशन गर्ने र विभिन्न सेमिनार गर्ने उल्लेख गरिएको छ।
फिफिए एपभित्र विभिन्न देशबीच भएका फुटबल, अनलाइन गेमको विज्ञापन राखी अनलाइन गेम खेलाउने, रकम डिपोजिट गर्न लगाउने, रकम डिपोजिट गरेको ९० मिनेटभित्र लगानी गरेको रकमको ०.४८ प्रतिशतका दरले फाइदा रकम फाइदा हुने बताइयो।
यो एपमा दिनमा ३ पटक मात्र रकम इन्भेष्ट गर्न मिल्ने, यो कम्पनी कानुनसंवत छ भनी विश्वास दिलाउने काम दादिकाले गरेकी थिइन्। यसका लागि दादिकाले फिफिएको नाममा विभिन्न सेमिनार बैठक, गोष्टी समेत गरी प्रशिक्षण समेत दिने काम समेत गरेको प्रहरी अनुसन्धानबाट खुलेको छ। यी सबै गर्दा लागेको लगानी भने हङकङमा बसेका नागरिक चेनले तिर्ने गर्थे।
दादिकाले फिफिएको आईडी बनाएपछि त्यसको एडमिन जीवन श्रेष्ठ, विक्रम मण्डल, एमी केल्ली, एंगिला, टिना भएर चलाउने गरेका थिए। यस वापत कुल नाफाको ३० प्रतिशत ददिकालाई दिने भनिएको थियो।
यसरी हङकङमा रहेको गिरोहसँग मिलेर दादिकासहित ४५ नेपालीहरुले १८२ नेपालीहरुको पौने चार करोड रुपैयाँ ठगी गरेको अनुसन्धानबाट खुलेको छ।
उनीहरुले विभिन्न देशहरुमा हुने फुटबल तथा क्रिकेटहरुको अनलाइन बेटिङ खेल्नका लागि रकम डिपोजिट गर्न लगाउने र डिपोजिट गरेको ९० मिनेट भित्र लगानी गरेको रकममा १.४८ प्रतिशतका दरले फाइदा हुने बताउने गरेका थिए।
सुरुमा ११ लाख २७ हजार ठगी भएको उजुरीबाट सुरु भएको अनुसन्धानले यो गिरोहले पौन चार करोड रुपैयाँ ठगी गरिसकेको खुलेको हो। यसरी ठगिएकामध्ये थोरै रकम नेपालका एजेन्टले लिने बाँकी सबै रकम हङकङ पुग्ने गरेको प्रहरी निष्कर्ष छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1732445217.webp)
-1764146706.png)
