काठमाडौं– नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले हिंसा सुरु गरेको दिनलाई विजयोत्सव मनाउनेहरुको खुशीका लागि शान्ति प्रक्रिया टुंग्याएको बहानाबाजी गर्न नसकिने बताएका छन्।
बिहीबार संसद भवनमा बसेको संसदीय दलको संयुक्त बैठकलाई सम्बोधन गर्दै उनले यस्तो बताएका हुन्। उनले हिंसा मच्चाउने र अन्याय गर्नेहरु नै आज न्यायाधीश बनेर सरकारको साँचो बोकेर शान्ति प्रक्रिया टुंग्याउन भनेर लागेको बताए।
उनले क्रुर हत्या गर्नेहरुका पीडित परिवारको मुद्दालाई क्रान्ति भनेर मुद्दा नै नचलाइएको भन्दै आपत्ति जनाए। उनले हिंसा सुरु गरेको दिनलाई उत्सवको रुपमा मनाउने प्रवृत्तिबाट कसरी शान्ति प्रक्रिया टुंगिन्छ? भन्दै प्रश्न गरे। उनले शान्ति प्रक्रिया पीडितलाई न्याय दिनेगरी हुनुपर्ने बताए।
उनले भने, ‘हिजो जसले हिंसा मच्चायो, जसले अन्याय गर्यो, उनीहरु नै अहिले न्यायाधीश बनेका छन्, सरकारको ताला साँचो लिएर कस्सिएका छन्, शान्ति प्रक्रिया टुंग्याउन भनेर। गंगा अधिकारी गोरखा उहाँ अहिले पनि अनसनमै हुनुहुन्छ। उहाँका श्रीमान्को लाश अस्पतालमा छ। त्यो लाश उठाउन कुनै ध्यान छैन, यो सरकारलाई। उहाँको छोरो माओवादीले घिसारी घिसारी बोरामा हालेर दुई वटा मोटरसाइकलले घिसारेर मारेको छ। त्यो मुद्दा एउटा फौजदारी मुद्दा नभएर क्रान्ति हो भनेर त्यो मुद्दा नचलाएको छ। कसरी न्याय हुन्छ, तिनै मानिसहरु अहिले सरकारमा छन्। यस्तो मनोदशाले शान्ति प्रक्रिया कसरी सफल होला? शान्ति प्रक्रिया पीडितलाई न्याय दिनेगरी हुनुपर्छ। विजयोत्सव मनाउनेहरु तरमाराको खुशीका लागि शान्ति प्रक्रिया टुंग्याएको बहानाबाजी गर्न सकिँदैन।’
उनले सरकारमा रहेकाहरुलाई पीडितप्रति कुनै संवेदनशीलता नभएको बताए। बरु उल्टै हिंसा सुरु गरेको दिनलाई महान दिवस हो भनेर मनाउने र बिदा दिने तर हिजो अनावश्यक ढंगले मारिएकाप्रति कुनै चिन्ता नभएको टिप्पणी गरे। उनले भने, ‘संवेदनशीलता विल्कुल देखिँदैन, उल्टै हिंसा सुरु गरेको दिनलाई उत्सवको रुपमा मनाउँछन्, महान दिवस हो भनेर। बिदा दिइएको छ। एक पटक होइन, अब सधैँ हरेक वर्ष। हिजोको हिंसाप्रति, हिजो मानिस अनावश्यक ढंगले मारिए त्यसप्रति कुनै पनि चिन्ता छैन।’
अध्यक्ष ओलीले सरकार संविधान मिच्ने, बहुमतको घमण्ड गर्ने र अहंकार देखाउने काममा लागेको बताए। उनले स्वेच्छाचारी राज चलाउने, बलमिच्याइँ गर्ने कुरामा अहिलेको सरकार लागेको छ भन्नेकुरा रिगल ढकाललाई सर्वोच्च अदालतले आज दिएको आदेशले पनि पुष्टि गरेको बताए। उनले जनतालाई त्रसित बनाउने, दुःख दिने काममा सरकार लागेको बताए।
उनले भने, ‘सरकारले देशमा संविधान मिच्ने, आफूसँग बहुमत छ गठबन्धनको भन्ने अहंकार देखाउने, अदालतले पटकपटक सचेत गराउँदा पनि ति कुरालाई नमान्ने, कानुनी राज होइन, स्वेच्छाचारी राज चलाउने, बलमिच्याइँ गर्ने जस्ता कामहरु गर्यो। आजैमात्रै पनि सम्मानित सर्वोच्च अदालतबाट रिगल भन्ने उपनाम गरेका व्यक्तिको सम्बन्धमा जो नेपाल सरकारले सिफारिस गरेको थियो, राष्ट्रपतिले माफी मिनाहा गर्नुभएको थियो, गठबन्धनले बाजागाजा, अभिरजात्रा, फूलमालासहित त्यसलाई स्वागत गरेर लगेको थियो, अर्को एकजना सरकारले छोडेको त्यस्तै मान्छे हिजो कि अस्ति गिरफ्तार भएको छ। जनतालाई त्रसित बनाउने, दुःख दिने, विषयलाई लिएर। प्रदेश १ मा एक पटक होइन, पटकपटक संविधान मिचियो। एक पटक सम्मानित सर्वोच्च अदालतले यसरी खुलेआम संविधान नमिच भनेर सरकारलाई आग्रह गरेर उल्ट्याइसकेपछि नियुक्ति बदर गरिसकेपछि नियुक्ति नै नभएको मुख्यमन्त्री काम चलाउ मुख्यमन्त्री हुन्छ भनेर दुनियाँमा कहीँ नभएको व्याख्या गर्यो।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
