फाइल तस्बिर
काठमाडौं– सांसदहरुले सुपारी आयात—निर्यातमा चलखेल गर्न खोजेको आशंका व्यक्त गरेका छन्। बुधबार बसेको प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समिति बैठकमा बोल्ने अधिकांश सांसदहरुले विभिन्न चलखेल गरी सुपारी आयात—निर्यातको बाधा फुकाउने काममा समितिलाई अल्मल्याउने काम भइरहेको भन्दै आशंका व्यक्त गरेका हुन्।
उनीहरुले नेपालमा उत्पादित सुपारी आयात—निर्यात खोल्ने विषय समितिमा छलफल गर्न लगाएर बाहिर अर्कै चलखेल भइरहेको हुनसक्ने बताए। सांसदहरुले सरकारले सुपारी निर्यात—आयात सम्बन्धि कार्यविधि २०६८ नै सुपारी निर्यातको बाधक भएको भन्दै परिमार्जन गर्न आवश्यक रहेको बताए।
उनीहरुले समितिमा सुपारी किसानको कुरा उठाए पनि वास्तविक किसानको कुरा नै नभएको बताए। सांसदहरुले अन्य कृषिजन्य वस्तुहरुको आयात निर्यात गर्न सरकारले विशेष निर्णय गर्न नपर्ने तर सुपारीमा छुटै विशेष निर्णण गर्नुपर्ने कारण माग गरे।
सांसदहरुले सरकारले वास्तविक सुपारी किसानहरुको तथ्यांक यकिन गरी राख्न आवश्यक रहेको बताए। उनीहरुले नेपालमा सुपारीको आयात निर्यातको विषयमा विभागका निर्देशकदेखि मन्त्रीको समेत जागिर जाने गरेको भन्दै विचौलियाहरुले समितिलाई पंगु बनाएर बाहिर चलखेल गरेको बताए।
बैठकमा बोल्दै नेकपा (एकीकृत समाजवादी) का सांसद कृष्णकुमार श्रेष्ठले सुपारी आयात–निर्यातको विषयमा सचिवदेखि मन्त्रीकोसमेत जागिर जाने अवस्था रहेको बताए। उनले सुपारीको निर्यात सजिलै रुपमा खोल्न नहुने उल्लेख गरे। सुपारी निर्यात खोल्न समितिलाई मोहरा बनाएर बाहिर अर्कै चलखेल भइरहेको उनको दाबी थियो।
सांसद श्रेष्ठले सबै क्षेत्रमा शतप्रतिशत सुपारी उत्पादन भनिए पनि १४ हजार मेट्रिक टन मात्रै सुपारी उत्पादन हुने बताए। उनले समितिमा सुपारीको निर्यात खोल्न माग गर्दै उजुरी गर्नेहरु केही समय पहिला सुपारी निर्यात बन्द गर्नुपर्छ भन्दै आएको दाबीसमेत गरे। सुपारी आयात–निर्यात गर्नुपर्छ भन्ने विचौलियाहरु आवश्यकता अनुसार चल्ने उनको भनाइ थियो।
यस्तै नेकपा एमालेका सांसद लालप्रसाद साँवा लिम्बूले बारम्बार उद्योग समितिमा सुपारीको मात्रै छलफल किन गर्नुपर्ने? भन्दै प्रश्न गरे। उनले पनि बाहिर सुपारीको अर्कै चलखेल भइरहेको भन्दै चलखेल फुकाउने काम समितिलाई दिएको उल्लेख गरे।
उनले सरकारले सुपारी निर्यात–आयात सम्बन्धि कार्यविधि २०६८ नै सुपारी निर्यातको बाधक भएको भन्दै परिमार्जन गर्न आवश्यक रहेको बताए। समितिमा बोल्दै सांसद हेमराज राईले सरकारले नेपाली किसानले उत्पादन गरेको सुपारीलाई निर्यात गर्न सहजीकरण गर्न आवश्यक रहेको बताए।
उनले सरकारले वास्तविक सुपारी किसानहरुको तथ्यांक यकिन गरी राख्न आवश्यक रहेको उल्लेख गरे। समिति बैठकमा सांसदहरुले सुपारी वास्तविक किसानको समस्या पहिचान गरी सरकारले समस्या समाधान गर्नुपर्नेमा जोड दिए।
उनीहरुले सरकारले सुपारी आयात निर्यात गर्ने डिएनए परीक्षण लगायतका विषयमा आवश्यक प्रक्रियाको व्यवस्था गरी निर्यात गर्ने वातावरण बनाउनु जरुरी देखिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
