काठमाडौं– विद्युतीय चुरोट (भेप)मा लुकाएर भएको ९ किलो सुन तस्करी प्रकरणमा महराका बाबु–छोरा (कृष्णबकादुर महारा र राहुल महरा) माथिको अनुसन्धान अन्तिम चरणमा पुगेको छ। प्रहरीको केन्द्रीय अनुसन्धान ब्यूरो (सीआईबी)ले गत भदौ १३ गते पूर्वसभामुख तथा माओवादी केन्द्रका उपाध्यक्ष कृष्णबहादुर महराका छोरा राहुललाई पक्राउ गरेर उक्त सुन तस्करी प्रकरणबारे अनुसन्धान गरिरहेको छ।
छोरा पक्राउ परेको एक महिनापछि उक्त सुन प्रकरणबारे सोधपुछ गर्न तथा बयान कागजका लागि भन्दै सीआईबीले कृष्णबहादुर महरालाई बोलाएको थियो। सोमबार साँझ पौन ७ बजे सीआईबीमा पुगेर कृष्णबहादुर महराले बयान दिँदै कागजसमेत गरेका छन्।
उक्त सुन तस्करी प्रकरणबारे अनुसन्धान गरिरहेको सीआईबीले अनुसन्धान अन्तिम चरणमा पुगेको जनाएको छ। संगठित अपराधमा अनुसन्धान भएकाले ६० दिनसम्म हिरासतमा राखेर अनुसन्धान गर्ने समय सीआईबीले पाएको छ। अहिलेसम्मको अनुसन्धानबाट उक्त सुन तस्करी प्रकरणमा कृष्णबहादुर महाराको भने कनेक्सन नदेखिएको र छोरा राहुलको भने मतियारको भूमिका देखिएको सीआईबी स्रोतले नेपाल लाइभलाई जानकारी दियो।
‘अहिलेसम्मको अनुसन्धानले कृष्णबहादुर महराको कुनै संलग्नता देखिँदैन। हामीले उहाँसँग सोधपुछ गर्नुका साथै कागज समेत गराएका छौं। छोराको हकमा भने उहाँले मतियारको भूमिका निभाएको देखिन्छ’, सीआईबीका एक अनुसन्धान अधिकारीले नेपाल लाइभसँग भने।
सुन तस्करीका संलग्न रहेको भनिएका व्यक्तिसँग राहुलको बारम्बार कनेक्सन देखिएपछि उनलाई पक्राउ गरेर सीआईबीले अनुसन्धान गरेको थियो। सो क्रममा चिनियाँ नागरिकले आफ्नो सामान भन्सारमा अड्किएको बताएपछि के कस्तो हो छोड्न मिल्ने भए छाडिदिनु भनेर फोन गरेको कुरा राहुलले स्वीकार गरेका छन्। तर आफूलाई उक्त सामान सुन नै हो भन्ने थाहा नभएको बयान राहुलले दिएको सीआईबी स्रोतले नेपाल लाइभलाई जानकारी दियो।
उनले उक्त सामान सुन नै हो भन्ने थाहा नभएको बताए पनि पटक–पटक फोन गरेर सामान छाड्न र लिलामीको प्रक्रियाबारेसमेत चासो राखेकाले मुख्य योजनाकार तथा व्यवस्थापक नभए पनि मतियारको भूमिका भने देखिएको सीआईबीको दाबी छ। ‘राहुलकै योजनामा सुन आएको, सुनका लगानीकर्ता तथा व्यवस्था भएको भन्ने देखिँदैन। तर पटक–पटक फोन सम्पर्क हुनु र सामान छाड्न र लिलामीबारेसमेत चासो राखेकाले उहाँको भूमिका मतियार देखिएको छ। सोही अनुसार मुद्दा चलाउनुपर्ने रायसहित हामी अनुसन्धान फाइल बुझाउँछौं’, सीआईबीका एक अनुसन्धान अधिकृतले नेपाल लाइभसँग भने।
यता बाबुको हकमा भने कुनै कनेक्सन नेदेखिएको सीआईबीले जनाएको छ। ‘हामीले उहाँलाई बोलाएर सोधपुछ पनि गर्यौं। तर उहाँको कुनै भूमिका देखिएन’, सीआईबी स्रोतले भन्यो।
फ्लाई दुबईको जहाजमार्फत् गत पुस १० गते चिनियाँ नागरिक लि होसाङले सुटकेशमा लुकाएर भेपभित्र सुन ल्याएका थिए। सुनले भरिएको उक्त सुटकेश संकास्पद देखिएपछि विमानस्थल भन्सारले नियन्त्रणमा लिएको थियो।
भन्सारले पासपोर्टसमेत लिएर चिनियाँ नागरिक होसाङलाई छाडेको थियो। भोलिपल्टै चिनियाँ नागरिक होसाङले आफ्नो पासपोर्ट फिर्ता लिएर उनी स्वदेश फर्किका थिए। सुन ल्याउने समूहका अर्का चिनियाँ दाओजिङ वाङ पनि थिए। उनै वाङसँग महराका बाबुछोराको फोन सम्पर्क भएको देखिएको थियो।
वाङसँग सम्पर्क भएपछि राहुलले भन्सार प्रमुख अधिकृत मुक्तिप्रसाद श्रेष्ठलाई फोन गरेर उक्त सामानको लिलामी प्रक्रियाबारेसमेत चासो राखेका थिए। त्यतिबेलासम्म नियन्त्रणमा लिइएको उक्त सामान के हो भन्ने भन्सारलाई थाहा थिएन।
होसाङबाट बरामद भएका २ वटा सुटकेश आगमन कक्ष छेउकै कुनामा हुन्छन्। त्यो बीचमा बब्लुकुमार गुप्ता नाम गरेका व्यक्तिले भन्सारका नासु रेवन्त खड्कालाई उक्त सुटेकशभित्र भेप्सको रुपमा ९ किलो सुन भएको सुनाउँछन्। त्यसपछि रेवन्तले बल्लुलाई नै सुटकेश भएको ठाउँमा लैजाँदै भेप तान्न लगाउँछन्। तर धुँवा आउँदैन। त्यसपछि भेपको रुपमा अन्य बहुमूल्य वस्तु छ भन्नेमा उनीहरु ढुक्क हुन्छन्।
सुटकेश राखिएको कोठामा सीसीटीभीबाट निगरानी हुने भएकाले त्यस दिन केही गरिएन। त्यसपछि भन्सार एजेन्ट दिनेश बस्नेत र नासु रेवन्तबीच भेपको रुपमा भित्रिएको सुनबारे कुराकानी हुन्छ। त्यतिन्जेल उक्त सुन बिक्रीका लागि भारतीय नागरिकसँग डिलसमेत भइसकेको हुन्छ।
त्यसको करिब एक सातापछि मुद्दा शाखामा भएका सामानहरु लिलामी गर्ने र डिस्पोज गर्ने सामान छुट्याउने तयारी हुन्छ। त्यसपछि रेवन्तले ९ किलो सुनले भरिएको सुटकेस डिस्पोज गर्नुपर्ने भन्दै डिस्पोज गर्ने सामान राख्ने ठाउँमा कोठा नम्बर १११ मा सार्छन्। यो प्रक्रियामा रेवन्तसँगै दिनेश पनि सँगै हुन्छन्। त्यसपछि यी दुई जना मिलेर दुई वटा सुटकेशमा भेप्सको रुपमा भित्र्याइएको सुन धमाधम निकाल्छन् र त्यहाँ अरु नै भेप राखिदिन्छन्।
सुन तस्करसँग महरा बाबु–छोराको फोन सम्पर्क देखिने चार्ट। तस्बिर: सरकारी वकिल कार्यालयको प्रतिवेदन
त्यसपछि उक्त सुन ६ करोड रुपैयाँमा दिनेशले सुनसरीको धरान उपमहानगरपालिका–२ घर भएका वेदप्रकाश अग्रवाललाई बिक्री गर्छन्। भन्सारबाट उक्त सुन बाहिर लैजान सहजीकरण गरेवापत रेवन्तको निर्देशनमा दिनेशले प्रेरणा थापाको बैंक अफ काठमाण्डु र कृषि विकास बैंक लिमिटेडको खातामा ३० लाख र भाउजु ललिता राजभण्डारीको खातामा ५३ लाख गरी ६५ लाख रुपैयाँ हाल्न लगाएर ६५ लाख नासु रेवन्तले बुझ्छन्। वेदप्रकाश उक्त सुन भारतीय व्यापारी साहेब राव पाण्डुरङ मरगलेलाई बेच्छन्।
सुटकेशभित्रको भेप्समा सुन भएको र भेप्स साटफेर गरेर सुन निकालेर अर्कै भेप्स राखिएको पाइएको भन्दै भन्सार कार्यालयले वैशाख २६ गते सीआईबीलाई पत्राचार गर्दै अनुसन्धान गर्न अनुरोध गर्छ। त्यसपछि सीआईबीले दुई महिना लामो अनुसन्धान सकेर गरेर जिल्ला सरकारी वकिल कार्यालयमा बुझाएको प्रतिवेदन अनुसार जिल्ला अदालत काठमाडौंमा मुद्दा दायर भएको छ।
यो प्रकरणमा सीआईबीले भन्सारकै नायब सुब्बा २७ वर्षीय रेवन्त खड्का, सिन्धुपाल्चोकको सुनकोशी गाउँपालिका–६ घर भएका ३२ वर्षीय भन्सार एजेन्ट दिनेश बस्नेत, सुनसरीको धरान उपमहानगरपालिका–२ घर भई न्यूरोडमा घडी पसल सञ्चालन गर्दै आएका वेदप्रकाश अग्रवाल, भारतको महाराष्ट्रका ३९ वर्षीय व्यापारी साहेब राव पाण्डुरङ मरगले, सिन्धुपाल्चोककै सुनकोशी–६ का ३२ वर्षीय अमृत कार्की, पोखरा महानगरपालिका–४ का २२ वर्षीय पूर्व सुरक्षागार्ड निर्मलकुमार विकलाई पक्राउ गरेर मुद्दा दायर गरेको थियो। उनीहरु पुर्पक्षमा अहिले कारागारमा छन्।
भन्सार एजेन्ट दिनेश बस्नेतका भाइ तथा कार्गो एजेन्ट दिपेश बस्नेत, बस्नेत दाजुभाइका भिनाजु गोपाल सुवेदी र काभ्रेको बनेपा–१० का ५५ वर्षीय रामकेशव थापालाई फरार प्रतिवादी बनाएर मुद्दा दायर भएको छ। भिनाजु सुवेदीले नै सुन खरिदका लागि वेदप्रकाशसँग भेट गराइदिएको पाइएको छ।
सुरुमा बस्नेत दाजुभाइ र उनीहरुका भिनाजु सुवेदी भएर भेप्सबाट ८० ग्राम जति सुन निकाले र वेदप्रकाशलाई भेट्न न्यूरोड पुगेका थिए। त्यसपछि वेदप्रकाशसँग उनीहरुले ६ लाख रुपैयाँ बुझेका बताएका छन्। पछि वेदप्रकाशसँग आएका अर्का व्यक्ति भारतीय व्यापारी मरगलेलाई पटक–पटक गरेर उनीहरुले ६ करोड रुपैयाँमा सुन बेचेको अनुसन्धानबाट खुलेको छ।
उक्त सुन बेचेर आएको रकमबाट बस्नेत दाजुभाइ तथा उनीहरुका भिनाजु गोपाल सुवेदीले अमृत कार्कीको नाममा भक्तपुरमा जग्गासमेत किनेको पाइएको छ। जसकारण कार्कीलाई पनि प्रतिवादी बनाइएको छ। अर्का प्रतिवादी तथा भन्सारका पूर्व सुरक्षा गार्डले निर्मलकुमार विकले मुद्दामा शाखामा रहेको सुटेकेश गोदाममा पुर्याउने काम गरेका थिए। सो क्रममा सुटकेशबाट भेप्स भुइँमा खसेको थियो। उक्त भेप्स विकले आफ्नो खल्तीमा हालेका थिए। पछि तान्न खोज्दा धुवाँ नआएपछि फुटाएर हेर्दा सुन देखेपछि सिक्री बनाएर लगाएको खुलेको छ। जसकारण विकलाई प्रतिवादी बनाइएको सीआईबीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
