काठमाडौं– सुदूरपश्चिम प्रदेशको बझाङ जिल्ला केन्द्रबिन्दू बनाइ मंगलबार गएको भूकम्पको असर प्रदेशका ७ वटै जिल्लामा जिल्लामा देखिएको छ। सबैभन्दा धेरै क्षति भूकम्पको केन्द्रबिन्दू रहेको बझाङमा पुगेको छ।
भूकम्पबाट बझाङमा १ जनाको मृत्यु भएको छ। सुदूरपश्चिम प्रदेश प्रहरी कार्यालयका अनुसार भूकम्पबाट बझाङको जयपृथ्वी नगरपालिका–११ ओखलकी ४० वर्षीया गुनमति धामीको मृत्यु भएको हो। भूकम्पका कारण बझाङमा १८ जना घाइते भएका प्रहरीले जनाएको छ।
भूकम्पका कारण बझाङमा ६४ निजी घर ध्वस्त भएका छन्। २७७ वटा निजी घरमा भूकम्पले क्षति पुगेको छ। यस्तै, ९ वटा सरकारी तथा सामुदायिक भवनहरुमा क्षति पुगेको प्रहरीले जनाएको छ।
बझाङपछि बाजुरामा भूकम्पले बढी क्षति पुगेको छ। बाजुरामा ९ वटा निजी घर पूर्णरुपमा क्षतिग्रस्त भएका छन्। १३ निजी घरमा आंशिक क्षति पुगेको छ। बाजुरामा १ वटा सरकारी भवन पूर्णरुपमा क्षतिग्रस्त भएको छ। यस्तै, ५ वटा सरकारी भवनमा क्षति पुगेको छ। बाजुरामा भूकम्पबाट २ जना व्यक्ति घाइते भएका प्रहरीले जानकारी दिएको छ।
भूकम्पबाट अछाममा ५ जना मानिस घाइते भएका छन्। अछाममा १ वटा निजी घर पूर्णरुपमा क्षतिग्रस्त बनेको छ। २ वटा निजी भर तथा ५ वटा सरकारी भवनमा आंशिक क्षति पुगेको प्रहरीले जानकारी दिएको छ।
भूकम्पबाट बैतडीमा २ जना मानिस घाइते भएका छन्। बैतडीमा २ वटा निजी घर पूर्ण रुपमा क्षतिग्रस्त बनेका छन्। ३ वटा निजी घरमा आंशिक क्षति पुगेको छ। बैतडीका ३ वटा सरकारी कार्यालयमा पनि भूकम्पबाट आंशिक क्षति पुगेको छ।
दार्चुला र डडेलधुरामा भने भूकम्पले केही निजी घरमा आंशिक क्षति पुगेको छ। डडेलधुरामा ४ वटा निजी घरमा आंशिक क्षति पुगेको प्रदेश प्रहरी कार्यालयले जनाएको छ। दार्चुलामा भने एउटा निजी घर र २ वटा सरकारी भवनमा आंशिक क्षति पुगेको छ।
तराईका जिल्लाहरु कैलाली र कञ्चनपुरमा भुकम्पको धक्का महसुस भए पनि भौतिक तथा मानवीय क्षतिको विवरण प्राप्त नभएको प्रहरीले जनाएको छ।
भूकम्पबाट प्रदेशका ७ वटै जिल्लामा गरी १ जनाको मृत्यु तथा २७ जना घाइते भएका छन्। ७६ निजी घरमा पूर्ण रुपमा क्षति पुगेको छ। ३०१ वटा निजी भवनमा आंशिक क्षति पुगेको छ। ७ पहाडी जिल्लामा गरी १ वटा सरकारी भवनमा पूर्ण क्षति पुगेको छ भने ३२ वटा सरकारी भवनमा आंशिक क्षति पुगेको छ।
सुरुमा मंगलबार दिउँसो गलबार दिउँसो २:४० बजे बझाङ केन्द्रविन्दू भएर ५.३ म्याग्निच्यूडको भूकम्प गएको थियो। त्यसपछि दिउँसो ३:०६ बजे ६.३ म्याग्निच्यूडको भूकम्प गएको थियो।
भूकम्प मापन तथा अनुसन्धान केन्द्रका अनुसार मंगलबार दिउँसो ३:१३ बजे ५.१ म्याग्निच्यूड, दिउँसो ३:४५ बजे ४.१ म्याग्निच्यूड, दिउँसो ४:२८ बजे ४.१ म्याग्निच्यूडको भूकम्प गएको थियो। यस्तै, मंगलबार दिउँसो ४:३१ बजे ४.३ म्याग्निच्यूड, अपराह्न ५:१९ बजे ५ म्याग्निच्यूड, ५:३८ बजे ५ म्याग्निच्यूड, राति १२:१६ बजे ४.१ म्याग्निच्यूड र राति १२:५० बजे ४.३ म्याग्निच्यूडको भूकम्प गएको भूकम्प मापन केन्द्रले जनाएको छ।
बझाङ केन्द्रविन्दू भएर गएको भूकम्पको धक्का नेपालको कर्णाली, लुम्बिनी तथा गण्डकी प्रदेशमा पनि धक्का महसुस भएको थियो। यस्तै, भारतको उत्तराखण्ड, उत्तर प्रदेश, बिहार र दिल्लीमा पनि महसुस भएको थियो।
गत १ वर्षको अवधिमा सुदूरपश्चिम प्रदेशमा ६ म्याग्निच्यूडभन्दा माथिको तीव्रता भएका ३ वटा भूकम्प गएका छन्। भूकम्प मापन केन्द्र सुर्खेतका अनुसार २०७९ कात्तिक यता सुदूरपश्चिम केन्द्रविन्दू भएर ४ म्याग्निच्यूडभन्दा माथिको तीव्रता भएका ५० वटा भूकम्प गएका छन्। यस्तै, ४ म्याग्निच्यूडभन्दा कमको तीव्रता भएका २ हजार ७८ भूकम्प गएका छन्।
२०७९ कात्तिक २२ गते डोटीको खप्तड क्षेत्र आसपास केन्द्रविन्दू भएर ६.६ म्याग्निच्यूडको भूकम्प गएको थियो। उक्त भूकम्पको धक्काले भत्किएका भौतिक संरचनामा च्यापिएर डोटीको पूर्वीचौकी गाउँपालिका–३ गैरीगाउँका ६ जनाको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791545631.png)
-1786602170.png)
