काठमाडौं– दशैं, तिहार, छठ लगायतका चाडपर्व नजिकिँदै गर्दा अस्वभाविक रुपमा महङ्गी, कालाबजारी र तस्करी बढेको भन्दै सांसदहरुले सरकारको ध्यानाकर्षण गराएका छन्। बजारमा दैनिक उपभोग्य चिनी, खाद्यान्न लगायतका वस्तुहरुको अस्वभाविक मूल्यवृद्धि भएको सांसदहरुको भनाइ छ।
प्रतिनिधि सभाअन्तर्गतको सार्वजनिक लेखा समितिको बुधबारको बैठकमा सांसदहरुले चाडपर्वको सम्मुखमा दैनिक उपभोग्य वस्तुको मूल्यसँगै काला बजारी र तस्करी बढेको भन्दै त्यसबारे सरकारले तत्काल अनुगमन गर्दै कारबाही गर्नुपर्नेमा जोड दिएका छन्।
समितिको बैठकमा बोल्दै एमाले सांसद गोकुल बास्कोटाले भने,‘दशैंको बेलामा धेरै कुराको अभाव हुने गरेको छ। यही बेलामा मात्रै बजार अनुगमन र छापा मार्नुभन्दा सरकारले अरु बेलामा पनि यसलाई निरन्तरता दिनुपर्छ।’
सांसद बास्कोटाले मुलुकमा चिनी उत्पादन र बिक्री बितरण गर्ने व्यक्ति उही भएकाले सिन्डिकेट भएको आरोप लगाए।
उखु किसानको समस्या वर्षेनी रहेको बताउँदै बास्कोटाले उनीहरुको समस्या समाधानका लागि उत्पादकहरूका लागि कार्डको व्यवस्था गर्नुपर्ने बताए। उनले बजारमा गुणस्तरहीन चिनी बिक्री वितरण भइरहेको भन्दै सरकारको ध्यानाकर्षण गराए।
उनले समितिको बैठकमा आफैंले खल्तीमा बोकेर ल्याएको चिनीको ‘परीक्षण’ गर्दै हाल बजारमा गुणस्तरहीन चिनी बिक्री भइरहेको बताए। ‘म गुणस्तर मापदण्ड नाप्ने, परीक्षण गर्ने प्राविधिक त हैन। तर म चिनी परीक्षण गरेर देखाउन सक्छु। त्यो चिनी मैले यही समितिमै ल्याएको छु, यो कस्तो हुन्छ म देखाउँछु,’ बास्कोटाले भने। एउटा गिलासमा पानी भरेर चिनी घोलेका सांसद बास्कोटाले चिनी पुरै नघुली सेता कणहरु बाँकी रहेको देखाए। जसकारण उक्त चिनी गुणस्तरहीन भएको उनको भनाइ थियो।
राप्रपा अध्यक्ष राजेन्द्र लिंङ्देनले चिनी लगायतका खाद्य पदार्थमा अस्वभाविक मूल्यवृद्धि भएकाले त्यसबारे सरकारले चासो देखाउनुपर्ने बताए। उनले भने,‘चिनी लगायतका खाद्य वस्तुको मूल्य बढिरहेको छ। यसबारे नियमित अनुगमन र छलफल हुनुपर्छ।’ फरक प्रसंगमा बोल्दै अध्यक्ष लिंङदेनले नेपाल दूरसञ्चारमा उपभोक्ता बढेको भए पनि त्यसको राजस्व घटेको भन्दै सरकारको ध्यानाकर्षण गराए। उनले एमसीसीले दिएको अनुदानभन्दा ठूलो राजस्व खेर गइरहेका दाबी गरे। उनले भने,‘यसबारेका छलफल हुनुपर्छ। नियमन हुनुपर्छ, चुहावट रोकिनु पर्छ। यो विषयमा समिति नै प्रस्ट हुनुपर्छ।’ उनले यसबारे प्रविधि ठिक नभएको हो कि?भन्दै प्रश्न समेत गरे।
माओवादी केन्द्रका सांसद लेखनाथ दाहालले लेखा समितिमा यसअघि आएका उजुरी र सरकारलाई दिएका निर्देशनबारे पूर्नरावलोकन गर्नुपर्ने बताए। उनले भने, ‘विगतमा सार्वजनिक लेखा समितिमा आएका उजुरीमाथि छलफल गर्नुपर्छ। के कारणले निर्देशन पालना भएन? समस्याको प्राथमिकता कायम गर्नुपर्छ। महङ्गी, काला बजारी र तस्करी नियन्त्रणमा यस समितिले निर्णय गर्नुपर्छ।’
कांग्रेस सांसद अर्जुन नरसिंह केसीले नागरिकहरुलाई सहुलियतपूर्ण खाधान्न उपलब्ध गराउनु पर्ने बताए। उनले भने, ‘बजारमा हरेक वस्तुको मुल्यवृद्वि भइरहेको छ। कालाबजारी मौलाएको छ। सरकारले दशैं, तिहार लगायतका चाडपर्व लक्षित पसल खोल्नुपर्छ। सरकारले नागरिकहरुलाई सहुलियतपूर्ण रूपमा खाद्य वस्तु पुर्याउनुपर्छ। यस विषयमा सरकार गम्भीर होस्।’ सांसद केसीले अस्पतालमा डाक्टर कुटिने गरेकोले उनीहरुको सुरक्षा गर्नुपर्ने, राहत शिक्षकको समस्याका विषयमा सरकार गम्भीर हुनुपर्नेमा जोड दिए।
एमाले सांसद योगेश भट्टराईले गठबन्धन सरकारले सार्वजनिक गरेको न्यूनतम कार्यक्रमको पूनरावलोकन गर्नुपर्नेमा जोड दिए। उनले भने, ‘गठबन्धन सरकारले प्रसतुत गरेको न्यूनतम कार्यक्रमको एकपटक पूनरावलोकन हुनुपर्छ। संसद्मा समेत वाचन गरेकाले त्यो अब पार्टीको मात्रै नभइ समग्रको सरकारको विषय हो।’ उनले सरकारले आफ्ना नीति तथा कार्यक्रममै नयाँ गाडी खरिद नगर्ने, विदेश भ्रमण कटौती गर्ने कुरा उल्लेख गरेको भए पनि त्यो विषय व्यवहारमा लागू नगरेको बताए। भट्टराईले भने,‘विदेश भ्रमणहरू कटौटी गर्ने, सवारी खरिद नगर्ने नीति कार्यक्रममा समेत उठान भएको र त्यसको घोर उलंघन भएको छ। २०१७/०१८ सामान्य परिस्थिति पछि यो ५–७ महिनामा विदेश जाने प्रधानममन्त्रीदेखि मन्त्री, सचिव, शाखा अधिकृतको संख्या उल्लेखनीय रुपमा बढेको छ। यसले अत्यधित सार्वजनिक खर्च बढिरहेको छ।’
बैठकमा राष्ट्रिय गौरवका आयोजनको अवस्था, नेपाल विधुत् प्राधिकरण, विदेशबाट खरिद गर्नुपर्ने फर्निचर, लेखा परीक्षण नगर्ने सार्वजनिक संघ, संस्था, महङ्गी, कालोबजारी लगायतका विषयमा सरकार गम्भीर हुनु पर्नेमा समितिमा रहेका सांसदहरुले जोड दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791454111.jpeg)
-1791448938.png)
-1786602170.png)
-1791388337.png)
