काठमाडौं– ६० किलो सुन तस्करी प्रकरणमा जिल्ला सरकारी वकिलको कार्यालय, काठमाडौंले त्रिभुवन विमानस्थल भन्सार कार्यालयका ५ कर्मचारीमाथि छानबिन अघि बढाउन सिफारिस गरेको छ।
६० किलो सुन तस्करी प्रकरणमा पक्राउ परेका ५ जना भन्सार कर्मचारीलाई भ्रष्टाचारको कसुरमा पनि अनुसन्धान गर्न भनिएको जिल्ला सरकारी वकिल कार्यालयका प्रमुख अच्युतमणि नेउपानले बताए।
सुन जाँच पासमा संलग्न जोखिम व्यवस्थापन शाखाका अधिकृत सन्तोष चन्द, भन्सार कार्यालयका भन्सार जाँच पास अधिकृत गणेशप्रसाद पौडेल, नायब सुब्बा वीरेन्द्र नेपाली, कुमार ढकाल र एक्स–रे जाँचकी सरोज श्रेष्ठमाथि भ्रष्टाचारमासमेत छानबिन गर्नुपर्ने देखिएकाले अनुसन्धान अघि बढाउन भनिएको उनले बताए।
उनीहरुले सरकारी पद दुरुपयोग गरी अकूत सम्पत्ति आर्जन गरेका वा हङकङबाट भित्रिएको सुनमा विभिन्न रुपमा भ्रष्टाचार गरेको हुनसक्ने भन्दै अनुसन्धानका लागि भनेको छ। सुन तस्करी प्रकरण जिल्ला अदालतमा मुद्दा दायर भएर बयान चलिरहेको छ।
जिल्ला सरकारी वकिलको कार्यालयले २९ जनालाई प्रतिवादी बनाउँदै करिब ३ अर्बभन्दा धेरै बिगो माग दाबी गरेको छ।
राजश्व अनुसन्धान विभागले साउन २ गते विमानस्थल भन्सारको जाँच पास भएर बाहिरिँदै गर्दा ब्रेक प्याडमा लुकाएर लैजाँदै गरेको सुन बरामद गरेको थियो।
उक्त प्रकरण शुरुमा विभागले नै अनुसन्धान गरेको थियो। पछि संगठित रुपमा सुन तस्करी भएको देखिएपछि नेपाल प्रहरीको केन्द्रीय अनुसन्धान ब्यूरो सीआईबीलाई जिम्मा दिएको थियो। सीआईबीले अनुसन्धान गर्दै जिल्ला सरकारी वकिलको कार्यालयलाई आफ्नो अनुसन्धान प्रतिवेदन बुझाएको थियो। उक्त अनुसन्धान प्रतिवेदनका आधारमा जिल्ला अदालतमा मुद्दा दायर भएर थुनछेकको क्रममा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
