काठमाडौं- सुदूरपश्चिमको कञ्चनपुरमा एक स्वास्थ्यकर्मीमाथि आक्रमण भएको छ। आफूलाई बिरामीको आफन्त भन्ने एक व्यक्तिले ड्युटीमा रहेका स्वास्थ्यकर्मीमाथि आक्रमण गरेका हुन्।
कञ्चनपुरको बेलौरी नगरपालिकामा रहेको श्रीपुर प्राथमिक स्वास्थ्य केन्द्रमा घाइतेको उपचारमा खटिएका अहेब नरेन्द्र प्रसाद गैरेमाथि हातपात भएको हो। मंगलबार राती ११:१५ बजेको समयमा टाउको र आँखामा चोट लागेर घाइते भएका बेलौरी ५ मैनाहाका बाबुराम चौधरीको उपचार गरिरहेका गैरेमाथि बेलौरीकै गोकुलपुर बजार बस्ने रामु भनिने राम बहादुर खड्काले आक्रमण गरेका हुन्।
स्वास्थ्य केन्द्रको सीसीटीभी फुटेज अनुसार खड्काले स्वास्थ्यकर्मी गैरेको घाँटी अठ्याउँदै आक्रमण गरेको देखिन्छ। आफूमाथि आक्रमण भएपछि स्वास्थ्यकर्मी गैरेले सिसिटिभीमा सबै कैद भइरहेको जानकारी दिएपछि आक्रमणकारी खड्काले थप आक्रमण नगरेको गैरेले जानकारी दिए।
सीसीटीभी फुटेजमा खड्काले प्रहरीकै अगाडि स्वास्थ्यकर्मी गैरेमाथि आक्रमण गरेको देखिन्छ।
आक्रमणकारी खड्काले उपचारका क्रममा ढिलाइ गर्नुका साथै टाँका लगाउन धागो छैन भनेपछि विवाद भएको बताएका छन्। उनले आक्रमण नभइ आफूले धक्का मात्र दिएको प्रतिक्रिया दिएका छन्।
सरकारले हेटौंडाको सञ्चो अस्पतालमा आक्रमण गर्नेहरुलाई कारबाही गर्ने गरी चिकित्सक संघसँग सहमति गरेको ४८ घण्टा बित्न नपाउँदै सुदूरपश्चिममा अर्का स्वास्थ्यकर्मीमाथि आक्रमण भएको हो।
रक्सी खाएर आएका व्यक्तिले एक्कासि घाँटी समातेर कुट्न थाले : अहेब
मंगलबार राति साढे ११ बजे ड्युटीमा रहेको अवस्थामा आफूमाथि कुटपिट भएको पीडित स्वास्थ्यकर्मी गैरेले नेपाल लाइभलाई बताए।
उनले भने, ‘म बिरामीको उपचार गर्दै थिएँ। रक्सी खाएका ४/५ जना आकस्मिक कक्षमै आए। तीमध्ये एक जनाले घाँटी समाउँदै कुटपिट गरे।’
उनले भने-
मंगलबार मेरो नाइट ड्युटी थियो। राति साढे ११ बजे म आकस्मिक कक्षमा ड्युटीमा थिएँ। एउटा दुर्घटनाको केस आएको थियो। मादक पदार्थ सेवन गरी लडेर चोट लागेको अवस्थामा एम्बुलेन्समा ल्याइएको बिरामी आकस्मिक कक्षमा थियो।
दुर्घटनाका बिरामीको सामान्य शल्यक्रिया गर्ने क्रममा मैले अस्पतालमा ती घाइते ल्याउनेहरुलाई ग्लोब्स किन्न पठाएँ। म ती बिरामीको शल्यक्रिया गर्ने तयारीमा थिएँ। त्यही क्रममा आकस्मिक कक्षमै ४/५ जनाको समूह आइपुग्यो। उनीहरुले मादक पदार्थ सेवन गरेका थिए। उनीहरुले स्वास्थ्य केन्द्रको अध्यक्ष र इन्चार्जको नम्बर मागे। म बिरामीको शल्यक्रिया गर्न ग्लोब्स लगाएको अवस्थामा थिएँ। उनीहरुलाई मोबाइल निकालेर नम्बर दिन सक्ने अवस्थामा थिइनँ। मैले हातमा ग्लोब्स लगाएको छु, अहिले नम्बर दिन सक्दिनँ। तपाईंहरुसँग पनि नम्बर होला। बाहिर गएर फोन गर्नुस् भनेँ। त्यसपछि एक जनाले म माथि हातपात गर्न थाले। मेरो घाँटीमै समाएर मलाई कुटपिट गर्न थाले।
राति उनीहरुकै गाउँको एम्बुलेन्स स्वास्थ्य केन्द्रमा आएको देखेर मादक पदार्थ सेवन गरेको अवस्थामा उनीहरु स्वास्थ्य केन्द्रमा आएका रहेछन्।
ममाथि कुटपिट हुँदा बजारमा ड्युटीमा खटिएका दुई जना प्रहरी पनि स्वास्थ्य केन्द्रमै आइपुगेका थिए। प्रहरीले ममाथि कुटपिट भएको हेरिरहे, केही पनि गर्न सकेनन्। कुटपिट भएपछि त्यहाँ भएको प्रहरीले थप प्रहरी बोलायो। तर प्रहरीको समूह आउँदासम्म उनीहरु हिँडिसकेका थिए।
उनीहरुले हाम्रो स्वास्थ्य केन्द्रका इन्चार्ज गोविन्दबहादुर विष्टलाई समेत धम्क्याएर गए। कसलाई फोन गर्छौ गर, प्रहरी, सिडिओ जसलाई गरे पनि गर भनेर धम्क्याएर गए।
ममाथि भएको घटनाको विषयमा प्रहरीमा आज ठाडो उजुरी दिइसकेका छौं। जिल्ला प्रशासन कार्यालय र प्रहरीमा जाहेरी पनि दिने तयारी भइरहेको छ। ममाथि कुटपिट गर्नेको नाम रामु भनिने रामबहादुर खड्का हुन्। बेलौरी नगरपालिका-२ का हुन् उनी। उनलाई अहिलेसम्म प्रहरीले समातेको छैन। ममाथि कुटपिट गर्नेलाई कारबाही प्रक्रिया अघि नबढेसम्म भोलिदेखि हामीले उहाँ अनिश्चितकालीन बन्दको घोषणा गरेका छौं।
मेरो घाँटी थिचेर कुटपिट गरेकाले स्वास्थ्यमा समस्या देखिएको छ। त्यसैले अहिले म धनगढीमा थप उपचारको लागि जाँदैछु। घाँटीमा रातो भएको छ। खानेकुरा निल्न पनि गाह्रो भएको छ। घाँटी दुखेको छ, यताउता घुमाउन भएको छैन। मलाई गाह्रो भइरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
