काठमाडौं- ललिता निवासको सरकार जग्गा व्यक्तिका नाममा लाने प्रकरणमा भाटभटेनी डिपार्टमेन्ट स्टोरमा सञ्चालक मीनबहादुर गुरुङले आरोप स्वीकार गरेका छन्। उनले तीन जना मिलेर भाटभटेनी डेभलपर्स प्रालि खोली जग्गाको खरिदबिक्री गरेको बयान नेपाल प्रहरीको केन्द्रीय अनुसन्धान ब्युरो (सीआईबी) लाई दिएका छन्।
बयानमा उनले आफूसहित शोभाकान्त ढकाल र रामकुमार सुवेदी मिलेर उक्त जग्गा विकासको काम गरेको बताएका छन्।
ललिता निवास प्रकरणमा सीआईबीले जग्गा किर्तेमा उनीहरू तीन जना नै मुख्य अभियुक्त भएको दावी गर्दै सोही रुपमा कीर्ते गर्ने कार्य संगठित रुपमा भएको दाबीसहित मुद्दा दायर गर्नुपर्ने राय दिएको छ। सीआईबीको उक्त राय जिल्ला सरकारी वकिलको कार्यालय काठमाडौंमा अध्ययनकै क्रममा छ। सरकारी वकिलको कार्यालयले शुक्रबार वा आइतबार अभियोगपत्र जिल्ला अदालतमा पेस गर्ने तयारी गरेको छ।
उक्त बयानमा गुरुङले ढकाल र सुवेदीसँग २०६०/६१ सालमै चिनजान भएको र ललिता निवासको क्यामभित्रको जग्गाको काम गर्ने सहमती भएको स्वीकार गरेका छन्।
‘हामी ३ जना मिली भाटभटेनी डेभलपर्स प्रालि खोली जग्गा विकासको काम गरेका हौ। भाटभटेनी डेभलपमेन्ट कम्पनी प्रा।लि। कम्पनी रजिष्ट्रारको कार्यालयमा दर्ता रही संचालनमा रहेको छ,’ उनको बयानमा भनिएको छ ‘उक्त कम्पनिको संचालकहरूमा म, मेरो श्रीमती सावित्री गुरुङ, रामकुमार सुवेदी र शोभाकान्त ढकाल रहेका छौँ। म र मेरी श्रीमती सावित्री गुरुङको नाममा ५१५ शेयर रहेको छ भने रामकुमार सुवेदी र शोभाकान्त ढकालको गरी ४९५ शेयर लगानी रहेको छ।’
उनले ललिता निवास क्याम्प भित्रको अं ५ रोपनी जग्गा भाटभटेनी डेभलपमेन्ट कम्पनी प्रा।लि।को नाममा खरिद गरेका दावी गरेका छन्।
२०६७ सालमा प्रधानमन्त्रीज्यूको निवास विस्तारको क्रममा काठमाडौं जिल्ला कामपा वडा नं ४ को सिट नम्वर १०२५–१५ को साविक कि.नं. ७५ को ५९५।८० ब.मि. जग्गा मध्ये हालको कि.नं. २११ को ९९।३५ ब।मि। र ५९१ को ३३।७९ ब।मि। जग्गा जग्गाधनी पुर्जाको आधारमा खरिद गरेको पनि उनले दावी गरेका छन्।
जग्गा खरिद गरेको दावी गरेका गुरुङले मुल्य भने आफूले विर्सेको जवाफ दिएका छन्।
‘बालुवाटार स्थित शैलजा राणा, सुनिति राणा, रुक्म शमसेर जबरा, हेमाद्री शमसेर जबरा, हाटक शमसेर जबरा र हेमन शमसेर जबरा समेतको नाममा दर्ता कायम रहेको जग्गा खरिद गर्नु पर्यो भनी मलाई प्रस्ताव गरी जग्गाको जग्गाधनी दर्ता प्रमाण पुर्जा, नक्सा समेतका आवश्यक कागजात देखाएकोमा मैले कागज हेर्दा जग्गामा मोही समेत देखिएको, एक जनाको नाममा दर्ता रहेको जग्गा अर्को व्यक्तिको नाममा रहेको जग्गाले छेके देखेपछि खरिद गरेको हुँ,’ उनले भनेका छन्। ‘ जग्गामा जाने बाटो समेत नभएकोले यस्तो झमेला भएको जग्गा खरिद गर्न सक्दिँन भन्दा शोभाकान्त ढकाल र राम कुमार सुवेदीले १५ दिन भित्र मोही मिलाउँछौं, राणा परिवारको जग्गा समेत खरिद गर्ने व्यवस्था मिलाउँछौं, तपाईंले जग्गा किन्दा फरक पर्दैन भनि विश्वाश दिलाएकाले खरिद गरेको हो।’
उनले शोभकान्त ढकाल र रामकुमार सुवेदीसँग पनि संयुक्त जग्गा रहेको स्वीकार गरेका छन्। उक्त जग्गा प्रकरणमा दुवै जना विचौलिया हुन्। सुवेदी मालपोत कार्यालयमा लेखनदास थिए भनेन ढकाल राजनीतिक नेक्सस मिलाउने व्यक्ति हुन्।
‘शोभाकान्त ढकाल र राम कुमार सुवेदीको पहलमा हेमाद्री शमसेर जबरा सँग ०–१२–०–० रोपनी जग्गा राम कुमार सुवेदी, शोभाकान्त ढकाल र म समेतको संयुक्त नाममा खरिद गरेका हौं ’ उनले भने ‘ हाल उक्त ०–१२–०–० रोपनी जग्गा ललिता निवास क्याम्प भित्रको जग्गामा रहेको भाटभटेनी सुपर मार्केटको गोदाम र सो भित्रका अन्य कित्ता जग्गामा जाने बाटोको रुपमा प्रयोग भइरहेको छ। ’
न्यायाधीशलाई दिएको स्वीकार
गुरुङले आफूले जग्गा सर्वोच्च अदालतका न्यायाधीश कुमार रेग्मीलाई दिएको स्वीकार गरेका छन्।
‘तत्कालीन समयमा कुमार रेग्मी म समेतको स्वामित्वमा रहेको व्यवसायको कानुनी सल्लाहकार रहेको र निजले म सँग घर बनाउने प्रयोजनका लागि बालुवाटारमा जग्गा खरिद गर्ने ईच्छा व्यक्त गरेकाले मैले आफ्नो नाममा रहेको उल्लेखित कित्ता र क्षेत्रफलको जग्गा तत्काल चलनचल्तीको मूल्य लिई निजलाई बिक्री गरेको हुँ,’ उनले भनेका छन्, ‘के कति रकममा बिक्री गरें, लिखत हेर्दा थाहा हुन्छ।’
उनले उक्त जग्गा कानुन व्यवसायको फिमार्फत दिएका थिए। विवादित भएपछि रेग्मीले फिर्ता गरेर अख्तियार दुरुपयोग अनुसन्धान आयोगको भ्रष्टाचार मुद्दावाट उन्मुक्ती पाएका थिए। हालपनि उनलाई उन्न्मुक्ती दिइएको छ।
‘
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
