काठमाडौं- प्रधानन्यायाधीश विश्वम्भरप्रसाद श्रेष्ठको सपथ ग्रहणको समय जुध्ने भएकाले प्रतिनिधि सभाको मंगलबारको बैठक स्थगित भएको छ।
सपथ ग्रहणमा प्रधानमन्त्री पुष्पकमल दाहाल प्रचण्ड र सभामुख देवराज घिमिरे पनि जानुपर्ने भएकाले मंगलबारको सदन नचल्ने एमालेका प्रमुख सचेतक पदम गिरीले बताए।
मंगलबार सिंहदरबारस्थित प्रधानमन्त्री कार्यालयमा बसेको सर्वदलीय बैठकमा थप सहमति भने भएन। उच्चस्तरीय छानबिन आयोगको कार्यक्षेत्र टुंग्याउन सोमबारको बैठकले कांग्रेसका रमेश लेखक, एमालेका सुवास नेम्वाङ र माओवादी केन्द्रका हितराज पाण्डे सम्मिलित कार्यदल गठन गरेको थियो। त्यसले लगभग आफ्नो काम टुंगो लगाएको गिरीले बताए।
'उहाँहरुलाई उच्चस्तरीय छानबिन समितिको कार्यविधिका सम्बन्धमा, त्यसको टीओआर कस्तो बनाउने भनेर मस्यौदा तयार गर्न जिम्मेवारी दिइएको थियो,’ उनले भने, 'त्यो काम करिबकरिब पूरा गर्नुभएको छ। शीर्ष नेताहरुको छलफलमा त्यसलाई राखेर आजै टुंग्याउने कुरा थियो। तर आज ४ बजे प्रधानन्यायाधीशको सपथ ग्रहण भएकाले प्रधानमन्त्री र सभामुख जानुपर्ने भएकाले आज समय अपुग हुन गयो। अर्कोतिर एमाले अध्यक्ष केपी ओली पनि बिरामी हुनुभयो।'
भोलि सम्भवतः ११ बजे पुनः बैठक बस्ने गरी आजको बैठक सकिएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
